Elfazî Toral

 

STENBOL – îdarekara DBP’yî Besra Îşsever dîyar kerd ke hêrişê Rojawanî ser o dewamê sîyasetê înkar û îmhayî yê bi Lozanî ameyê ferzkerdişî yê û va: “Hêrişê DAIŞî û çeteyan tenya hemverê herêmêk nîyo; hemverê her çar parçeyê Kurdistanî û kurdanê Ewropayî yo.”

 

Îdarekarîya xoserî ya Rojawanî fehmê netew-dewlete yê bi sînorê Lozanî ameyê xêzkerdişî newe ra munaqeşeyî ra akena û hemverê sîyasetê seserre şiknayîşêk tarîxî awan kerd. Modelê netewa demokratîk a Rojawanî cuyayîşêka newe ya xo sepernena cuyayîşêka azad û têduştîya cinsî mûnena. îdarekara Partîya Herêmanê Demokratîkan (DBP) Besra Îşsever derheqê hêrişê  Rojawanî û yewîya neteweyî ser o ercnayîş kerd.

 

Têkoşînê 50 serrî

 

Besra Îşsever da zanayîş ke hêrişê Rojawanî ser o prosesêk krîtîk yê tarîxî yê semedê şarê kurdî hewêneno û wina bale ant Peymana Lozanî ser o: “100 serrî verê Peymana Lozanî ameya îmzakerdiş û Kurdistan çar parçeyan rê ame visnayîş. Bi nê hewl dayî kurdan mîyanê xo de bihelênê û çin bikerê. Kurdî seserre yo sîyasetê înkarî dir rî bi rî yê. Labelê 11 serrî verê bi serkêşîya cinîyan Sûrîye de Şorişê Rojawanî pê ame û no sey cewabêk o. Hêrişê DAIŞî û çeteyê bînî yê hemverê kurdan tenya hemverê herêmêk nîyo. Hemverê her çar hetê Kurdistanî û destkewtişê kurdan o. Nê hêrişan dir reyke yeno dîyayene ke têkoşînek yewbîyayî yo semedê pawitişê destkewtişê kurdan ferz o.”

 

Paradîgmaya cuyayîşa newe ya Birêz Abdullah Ocalanî

 

Besra Îşsever wina dewam kerd: “Birêz Abdullah Ocalan 50 serrî verê wexto ke nê têkoşînî dest pêkerd, bi paradîgmaya cuyayîşa newe vet orte ke bêkurdan cuyayîş nêbeno. Toximê 50 serrî verê ameyî eştiş, şîn bîyê û açaryayî dare. Bêvengîya hêzê mîyanneteweyî yê hemverê hêriş û qirkerdişan reyke bîn mojna ke ganî şarê kurdî hem dîplomasî de hem wareyê pawitişî de bibê yew. Ganî şarê kurdî bi ruhê têkoşînê hemparî têkoşîn bikerê. Dimayê hêrişan têkoşînêk xurt vejîya orte. Her çar hetê Kurdistanî, zaf cayê dinya de kurdî û hevalê kurdan wuştî lingan ser. Bi mîlyonan kesî vejîyayî wareyan. Esasê nê serkewtişî paradîgmaya Birêz Ocalanî ya.”

 

Venga têkoşîn û rêxistinbîyayîşî

 

Besra Îşsever bale ant serê mutabakatê mîyanê HSD û HTŞî de ameya îmzakerdiş û wina peynî ard: “Tîya de çîyo esas bîyayîşê modelê netewa demokratîk ê wareyî yo. Modelê ma modelê cuyayîşa hempar o. Paradîgmaya Birêz Ocalan ntenya Rojhelatê Mîyanên de nê heme dinya de veng dana. Nimûneyê Rojawanî zî orte de yo. Ma wayîrê bedelê pîl û mîrasê 50 serrî yê. Tenya ma nê, heme cinîyê dinya hemverê birnayîşê gilayanê cinîya kurde bi reaksîyon ê. Ma do têkoşîn, rêxistinbîyayîş û yewîya xo hîn zêdeyêr xurt û pîl bikerê.”