Devrîm Findik

 

STENBOL - Cinîyan derheqê hedefgirewtişê gilayanê cinîyan yê hetê çeteyê HTŞ’yî û dîmenê ke pare ameyî kerdiş de qisey kerdî û wina vatî: “Bedenê cinîyan ser o polîtîkayêka şîdetî yê sîstematîk est o. Sazgehê mîyanneteweyî bêveng ê. Nê hêrişî yewbînan ra xoser nîyê.”

 

Çeteyê HTŞ’yî gilayanê cinîyan hedef girewtî û vîdeoyê antî çapemenîya dîjîtale de weşan kerdî. Nê dîmenî hetê newe yê şîdetê cinîyan ser o vet orte. Cinîyan ajansê ma rê derheqê babete de ercnayîş kerdî û dîyar kerdî ke hêriş tesadufî nîyê, îdeolojîk û sîstematîk ê.

 

Cinîya bi nameyê Hatîce Korkmaz da zanayîş ke cinî bêsebeb hedef yenê girewtiş û wina va: “Çî sûcê cinîyan est o, çira wina kenê? Ma xirabîya ke ameyê kerdiş vanê labelê tu çî destê ma ra nîno.”

 

‘Ganî tu kes hemverê şîdetî de bêveng nemêno’

 

Cinîya bi nameyê Ezgî Şayan zî dîyar kerd ke hêrişê cinîyan ser o sînoran derbaz kerdê û wina dîyar kerd: “Ma şîdetê welatek bîn yê cinîyan ser o tîya xoser nêgîrê dest. Heme girêdaye yê. Ganî ma reaksîyon bimojnê. NY reaksîyonê baş nêmojneno, çîyê lazimî nêkeno. DAIŞ problemê dinya yo. Labelê serekê ma zî dem bi dem piştîdayîşê nê rêxistinê terorî keno.”

 

Şerîfe Çelîk dîyar kerd ke şîdetê yenê ciwîyayene birînê kûr akenê û wina dîyar kerd: “Wa pêrodayîşî vinderê, mergî vindarîyê. Wa kezeba kesî nêveşo. Ma aştîye wazenê.”

 

‘Fikrê înanê pêroyî çinkerdişê cinîyan ser o’

 

Seza Duru bale ant serê îdeolojîyê HTŞ’yî û DAIŞî yê dişminê cinîyan û wina ard ziwan: “DAIŞ rêxistinêk ke ganî çin bibo. Fikrê înan çinkerdişê cinîyan o. Rêxistinêk terorî yo ke vano ez şerîatî ya. Nê çîyê ke kenê semedê Îslamî baş nîyo, xirab o.”

 

‘Ganî hemverê şîdetî de zêdeyêr vengê xo berz bikerê’

 

Îrem Gunyol dîyar kerd ke hêrişê cinîyan ser o munferît nîyê û qiseykerdişê xo wina dewam kerd: “Ganî nê sîstemî bivurnê. Tenya Sûrîye ser o nê, camêrdî her cayî de cinîyan hedef gênê, şîdet kenê. Ganî cinî hemverê nê zêdeyêr vengê xo berz bikerê. Cinî her tim yenê binpaykerdiş û çinkerdiş.”