MERKEZÊ XEBERAN - Şarê Rojawanî, pawitişê herra xo dewam kenê û Tirkîya destûr nêdana ke hetkarîyê semedê Kobanê ameyê arêdayîş, derbas bibê.

 

Vizêrî ra cepheyê verên yê herême Rojawanî de rewşe aram e la ablûqayê Kobanê ser o dewam kenê. Roniştoxê Cizîrî û Kobanê çarçewaya seferberîya pêroyî de herêmanê xo pawenê.

 

Roniştoxê ke dewan û taxanê xo pawenê, dîyar kerd ke ê do çarçewaya pawitişê meşrû de wezîfeyê xo pê bîyarê.

 

Sewbîna ablûqa Kobanê ser o roja 13ine de dewam kena. Bajar de werd, derman û şitê tutan kêmî bîyê û dewleta tirke rayîr nêdana ke hetkarîyê ke şarê Vakurê Kurdistanî arê dayê, berê Murşîdpinarî ra derbasê Kobanê bibê.