MÊRSÎN - Çîgdem Goksoy dîyar kerd ke Rojawan de şar cuyayîşê hembeş awan kerdo û va: “Cinî û tutî hedef yenê girewtiş. Çete tenya problemê herêmî nîyê ê dinya yê.”

 

6ê çeleyî ra heta nika HTŞ û çeteyê ke Tirkîya piştîdayîş dana, pêwa adirbestî hêrişê hemverê Rojawanî dewam kenê. Eşkerayîya ke Hêzê Demokratîkî yê Sûrîye (HSD) kerd de ame dîyarkerdiş ke çeteyê HTŞ’yî 20 rey zêdeyêr adirbestî binpay kerdê. Yew DAIŞîyêk verê û çeteyê neweyê HTŞ’yî porê şervanêka YPJ’yî birna û dîmen çapemenîya dîjîtale de pare kerd. Dimayê nê her çar parçeyê dinya de cinîyan bi kampanyaya “KeziyêMaTersêŞima” piştîdayîşê cinîyanê Rojawanî dewam keno.

 

Sereka Komeleya Cinîyan a Mîmoza Çîgdem Goksoy qirkerdişê ke DAIŞî hemverê cinîyanê êzidîyan kerd ard vîr û da zanayîş ke Rojawan de hêrişan de cinî û tutî hedef yenê girewtiş.

 

‘Cinî û tutî tehlukeyê de yê’

 

Çîgdem Goksoy dîyar kerd ke zîhnîyetê HTŞî’yî serra 2014ine de Şengal de cinîyanê êzidîyan ser o dîyî û va: “Ez wazena endîşeyê cinîyanê kurdan, êzidî, cinîyanê Sûriyeyî û şaran bîyarî ziwan. 2014ine de semedê torê xoverdayîşê cinîyan bêro hîrakerdiş wareyê Tirkîya û hetê heme şaran de destkewtişê girdî ameyê bidestkerdiş. Rotişê cinîyanê êzidîyan yê bazarê koleyan ra bigî heta remnayîşê tutan, dimayê nê prosesan şaran xo newe kerd û rayîr û metodê neweyî dîyî. Rêxistinê xo awan kerdî. Labelê nika ma vînena ke cinî û tutî nê prosesî de ancî tehlukeyê de yê.”

 

‘Hêriş hemverê destkewtişê Rojawanî yo’

 

Çîgdem Goksoy dîyar kerd ke na sewîya de fehmê yewparêzî yeno ferzkerdiş û wina dergî da: “Ma bi îdeolojîyêka netewperest, mîlîtarîst û yewparêzî dir rî bi rî yê. Hêrişê  Rojawanî ser hemverê destkewtişê uca yê. Elewî, durzî, sunnî û şîîyan Rojawan de cuyayîşêke hembeş mûnayî. Nimûneyêk cinîyan a JINWARî est o. Nika hewl danê nê destkewtişê cinîyan peyser bierzê. Hêzê mîyanneteweyî wazenê Sûrîye, Rojawan de xo mende bikerê.”

 

‘Ganî heme dinya nê zîhnîyetî bivîno’

 

Çîgdem Goksoy wina peynîya qiseykerdişê xo ard: “Şerêk ke mîlîtarîstan xurt kerdo û mîyan de komê HTŞ’yî est ê ameyê awankerdiş. No şer serê por, bedenê cinî de pê yeno. Porê cinîyan hetê kurdan de sey şîn yeno sembolîzekerdiş. Porê cinîyan dewamkerdişê şînî ano. Ma bi adetanê xo pîl bîyê. Demo ke ciwanêke dinyaya xo bedelnena, por yeno birnayîş û danê gorî ser. Dimayê dîmenan hemverê nê refleksêk gird awan bî. Bi armancê ke balê biancê şerî ser cinîyan wareyan de têkoşînê xo domnayî. Nê semedî ra ganî rêxistinbîyayîş her wareyî de aver şêro. Ganî raya pêroyî ya dinya nê zilmî û nê zîhnîyetî bivîno.”