MERKEZÊ XEBERAN - Heyva Sor a Kurdîstanî keyeyî ke taxanê Şêxmeqsûd û Eşrefîye ê Helebî ra koçber bîyê, Qampê Newroze de bi ca kena û lazimtîyanê înan ê merdimî peyda kena.

 

Heyva Sor a Kurdîstanî seba hetkarîya keyeyanî ke Heleb, Reqa û Tebqa ra koçber bîyê, seferber bîye. Bi seyan keyeyî ke hetê çeteyanê HTŞ, DAIŞ û SMO’yî ra bi zor ameyê koçberkerdene, yenê Hesekê û Qamişlo. Heyva Sor zî seba keyeyanî ke mîyanê şertanê zehmetan de ciwîyenê, mîyanê têgêrayîşêko bêvindertiş de ya. Bi seyan keyeyî ke ameyê koçberkediş Qampê Newroze de ameyê bicakerdiş. Sewbîna lazimtîyê keyeyan ê merdimî zî hetê Heyva Sor ra yene temînkerdene.

 

Bi zêdebîyayîşê hêrişan Hûmara koçberan zî zêde bena. Keyeyê herêmî ke binê kontrolê çeteyan de yê rojane tira vejîyenê û xo resnenê herêma Hesekê. Rayberîya Xosere Heyva Sor reyde cehd kena ke heme lazimtîyan bilez bîyara ca. Heyva Sor dîyar kerd ke koçberan rê heme tewir lazimtî lazim ê û waşt ke şar piştgirî û hetkarîya xo texsîr nêkero.