MERKEZÊ XEBERAN – Îran de hûmara qetilkerdişî, birîndaran û destbendkerdişan bi hezaran kesî ya. Ame zanayene ke rejîmê Îranî semedê cenazeyanê çalakîkeran teslîm bikero,  belgeyêk ke hin mercî ser de ameyê rêzkerdiş, bi înan dano îmzakerdiş.

 

Rêxistina HRANA’yî derheqê binpaykerdişê rejîmê Îranî yê hemverê şarê Îranî de hîn agahîyê neweyî pare kerd.

 

Goreyê agahîyanê rêxistine, destpêkê protestoyanê ke 28ê kanûna 2025ine dest pêkerdî ra, 24 hezar û 669 kesî ameyî destbendkerdiş. 3 hezar û 919 kesî ameyî qetilkerdiş, 2 hezar û 109 kesî zî birîndar bîyî.

 

Ame dîyarkerdiş ke mîyanê kesê ke ameyê qetilkerdiş de 25 tutî est ê. Sewbîna medyaya girêdayeyê rejîmê Îranî dîmenê 145 çalakîkeran weşan kerdê ke mecbur mendê îtîraf bikerê, semedo ke çalakîkeran sey ‘vînî kerdê’ pênase bikerê.

 

Sewbîna ame vatene ke hîna zaf cenazeyê çalakîkeran nêweşxaneyê tibê edlî de yê. Hêzê rejîmê Îranî zext keyeyan ser o keno ke bi bêvengî û şewe cenazeyan biniminê. Hêzê rejîmê belgeyêk ke nê mercan qebûl bikerê û îmza bikerê, dayî keyeyan. Eke keyeyî belge îmza bikerê eşkenê cenaze bigîrê.