Gulistan Gulmuş

 

RIHA – Cinîyê ke venga tewrbîyayîşê mîtîngê “Hêvî û Azadîye” semedê “heqê hêvîye” yê Rayberê Şarê Kurdî Abdullah Ocalanî kerdî, vatî, “Ganî heqê hêvîye Rayberê ma rê bêro dayîş û ganî o bieşko nê prosesî şert û mercanê azadî de bidomno. Bêrê ma semedê azadîya Serok Apo, semedê azadîya xo destê xo bidê yew.”

 

Platformê Sazgehê Demokratîkan (DEKUP) do 4ê çeleyî de Meydanê Îstasyonî yê taxa Yenîşehîrê yê Amedî de mîtîngê “Hêvî û Azadîye” virazo ke waştişê azadîya fîzîkî ya Rayberê Şarê Kurdî Abdullah Ocalanî bikero. Yeno pawitiş ke bi hezaran merdimî tewrê mîtîngî bibê ke ci de vengdayîşê semedê caardişê heqê hêvîye yenê kerdiş. Amadekarî bi lezkî semedê mîtîngo ke Rayberê Şarê Kurd Abdullah Ocalanî yê ke 27 serrî yo tepişte û binê tecrîdî de yo, dewam kenê. Her kuçe û qezayanê Kurdistan û Tirkîya de kuçe bi kuçe xebatî yenê kerdiş.

 

Hemserekê Partîya Herêmanê Demokratîkan (DBP) û Partîya Têduştî û Demokrasîya Şaran (DEM Partî) 25ê teşrîna peyêne de qezaya Pirsûsî ya Rihayî de kombîyayîşê çapemenîye viraştî. Hemserekê ke tewrê eşkerayîya çapemenîye bîyî, vernîya mîtîngo ke do 4ê Çeleyî de bêro viraştiş, venga tewrêbîyayîşî kerdî.

 

‘Ganî Rayber Apo prosesî şert û mercanê azadan de bidomno’

 

Hemsereka DEM Partî ya Bajarê Qersî Arzu Savaş Derman: “Demê peyênan de, dimayê vengdayîşo ke hetê Rayber Apo ra ame dayîş, ma kewtî prosesê Cimatê Demokratîkî û Aştîye. Ma bawer kenê ke semedo ke prosesê aştîye bi hawayêko rast aver şêro û cimat bivuryo û açaryo, ganî heqê hêvîye Rayber Ocalan rê bêro dayîş û nê prosesî şert û mercanê azadan de bidomno. Ma nê bawer kenê û waştişê şarî zî goreyê nê têgêreno. Ma pêro şarê xo dawetê rayîrşîyayîşê semedê heqê hêvîye yê Rayber Apo ke do 4ê Çeleyî de Amed bêro organîzekerdiş.”

 

‘Ma semedê azadîya Abdullah Ocalanî veng danê’

 

Hemsereka DBP ya Bajarê Amedî Ruçem Elyakut: “4ê Çeleyî 2026ine de, saete 13:00 de Meydanê Îstasyonî de, ma pêro şarê xo semedê azadîye, heqê hêvîye û azadîya Rayberê Şarê Kurd Abdullah Ocalanî û semedê aştîye dawet kenê. Bêrê ma pîya vengê xo berz bikerê.”

 

‘Wa Serok azad bibo’

 

Hemsereka DBP’yî ya Mêrdînî Nuhroj Turk: “4ê Çeleyî de saet 13:00ine de Amed mîtîngêk yeno viraştiş. Muhîm o ke bêro zanayene ke zaf polîtîka hemverê înkarê şarê kurdî yenê domnayene. Sey ke şima zanê, Rayberê Şarê Kurdî semedê cinîyan zaf xebate kerda, û ganî ma nê warî de çi destê ma ra bêro ma bikerê. Ganî ma welatê xo nas bikerê. Ganî ma bi hêzêko gird destê Serekê xo bigîrê. Tecrîdêko gird ser Serekî yeno ferzkerdiş; wa nika mîyanê ma de bo. Ma wazenê heqîqeto xo bieşnawê.”

 

‘Semedê azadîya Serek Apo dest bidê yew’

 

Hemsereka DEM Partî ya Îdirî Alya Akkuş: “Ez şarê ma silam kena. Ma do 4ê Çeleyî de mîtîngêk virazê. No semedê ma do mîtîngêk aştîye bibo. Ez bawer kena ke o do mîtîngêk bibo ke semedê şaranê Tirkîye feydeyîn bibo. Nê semedî ra, ez pêro şarê ma dawetê nê mîtîngî kena û ez wazena her kesê ke bêrîye aştîye keno tewrê nê mîtîngî bibo.”