Oznur Deger

 

WAN – Serfîraz Demîrer ya ke dimayê 10 serran newe ra ameye tehlîyekerdiş wina va: “Ma cinîyan dir munaqeşe kerd ke ma nê felsefeyî senîn şarî rê neql bikerê. Nika demo ke nê munaqeşeyî cimatî de bikewê pratîk ê. Ez a bawerîye de ya ke her kes do bi mesûlîyetê merdimîye wayîrê prosesî vecîyo. Ganî ma wayîrê erjê komunalî vecîyê.”

 

Zîndan de binpaykerdişê heqan her ke şino giranêr beno û no zî tesîrêko negatîf rewşa tepişteyan ser o keno. Vernî de tepişteyê nêweşî, hetê Heyetê Taqîbkerdiş û Îdareyî ra tehlîyekerdişê tepişteyan yenê astengkerdiş.

 

Serfîraz Demîrer 1ê kanûne de dimayê 9 serrî û 11 aşmî newe ra Zîndanê Cinîyan ê Erzînganî ra ameye tehlîyekerdiş. Tehlîyekerdişê aye zî hetê heyetî ra amebî taloqkerdiş. Serfîraz Demîrer 10ê çeleyê 2016ine de Mêrdîn de bi tometê ‘endamîya rêxistine’ ameye tepiştiş û 10 serrî ceza aye rê ameye birnayene. Serfîraz Demîrer Zîndanê Tîpa Eyê Mêrdînî, Tîpê Myê Bayburtî, Tîpa Tyê Ereglî Konyayî û Zîndanê Cinîyan ê Erzînganî de mende. Zîndanê Bayburtî de înfazê aye amebî veşnayîş.

 

Serfîraz Demîrer ya ke dimayê 10 serran newe ra ameye tehlîyekerdiş derheqê binpaykerdişê heqan ê zîndan û prosesê Aştî û Cimatê Demokratîkî de qisey kerde.

 

‘Zîndan de derheqê merdiman de tu çî çin o’

 

Serfîraz Demîrer da zanayîş ke 10 serrê tepiştişî de zaf binpaykerdişan dir rî bi rî ameya û nê çî va: “Ma hemverê her tewirê binpaykerdişî de têkoşîn domna. Zîndan cayê ke merdim uca de bimano nîyo. Uca de derheqê merdiman de tu çî çin o. Labelê ma wayîrê îradeyêko gird bîy. Uca cayê cuyayîşî nîno naskerdiş labelê ma uca de cuya neweyî awan kenê. Ma bi mîrasê têkoşînê Zîndanê Amedî nê ruhê xoverdayîşî pawitêne. Bi prosesê Aştî û Cimatê Demokratîkî ke serekîye dest pêkerd zî ma têkoşîn û rêxistinbîyayîşê xo aver berd.”

 

‘Binpaykerdişê heqan ê cidî est ê’

 

Serfîraz Demîrer dîyar kerde ke proses tesîrêk zîndanî ser o nêkerd û va: “Nê prosesî de binpaykerdişê heqan zêde bîy. Heyetê Îdareyî û Taqîbkerdişê tehlîyeyan bi ferzkerdişê ‘poşmanîye’ taloq kenê. Demêko derg ma nêeşkayîne vecîyê revîran. Pêwa ke ma wezaret û pêro sazgehan rê nusnayîne zî başî çin bîye. Zaf tepişteyê nêweşî dermankerdişê înan yenê astengkerdiş. Binpaykerdişê heqan ê cidî estbî.”

 

‘Ma proses bi keyf pêşwazî kerd’

 

Serfîraz Demîrer bale ant ser prosesê ke Rayberê Şarê Kurd Abdullah Ocalanî dest pêkerdo û wina qal kerd: “Zîndan de proses bi keyf ame pêşwazîkerdiş. Ma cinî bi keyf pêşwazî kerd. Ma bi vengê serekîye motîve bî. Ma bi rengê cinî proses girewtêne dest û xebatanê cidî domnayî.”

 

‘Ganî ma wayîrê erjê komunalî vecîyê’

 

Serfîraz Demîrer dîyar kerd ke zîndan de cuya newî awan kerdê û va: “Serekîye ra agahîgirewtiş ma rê moralêko gird viraşt. No proses her hetî ra muhîm o. Hetê kurdan û pêro şaran de muhîm o. Armanc cuya demokratîk semedê pêro şaran bikewo ciwîyayîş. Paradîgmaya serekîye wina hîra ya ke semedê pêro şaran eşkena biba cewab. Na felsefeyêka gird a. Ganî problemê kurdî bêro çareserkerdiş. Ma cinî zî bi rengê xo, ganî ma senîn bibê cewab, munaqeşeyê xo domnayî. Ma vatêne ma bi rengê cinî senîn nê felsefeyî şarî rê neql bikerê. Ma wendişê xo kûr kerd. Ganî her kes wayîrê prosesî vecîyo. Ganî her kes wayîrê erjê komunalî vecîyo.”

 

‘Huqûqê dişminîye dewam keno’

 

Serfîraz Demîrer dîyar kerd ke zîndan de huqûqê dişminî dewam keno û nê çî va: “Hevala ma Ardil Çeşme 30 serrî yo tepişte ya û di serrî yo tehlîyeyê aye yeno taloqkerdiş. Semedê çîyanê verênan polîtîkaya cezakerdişî domnenê. Labelê ma bi mîrasê xoverdayîşê ke Zîndanê Amedî ra girewtê têkoşîn domnayîne. Tepişteyê nêweşî yê 73 serrî nêyenê veradayene. Zîndanê Erzînganî de 24 tepişteyê cinî mendêne. Tehlîyeyê 5 tepişteyan Nurcan Arslan, Ardil Çeşme, Hîvda Çelebî, Berîtan û Saadete bi keyfî yenê taloqkerdiş. Hetê weşîye de binpaykerdişê cidî yenê ciwîyayene.”