AMED – Komîsyonê Cinîyan ê Komeleya Heqê Merdiman (OHD) neql kerd ke înan derheqê heqaretanê ke sîyasetmedara kurde Leyla Zana rê ame kerdiş de gerre kerdê û muracatê huqûqî Federasyonê Futbolî yê Tirkîya (TFF) rê kerdî.

 

Komîsyonê Cinîyan ê Komeleya Huqûqnasan ê Azadî (OHD) verê dadgehe de kombîyayîşê çapemenîye viraştî û neql kerdî ke ê hemverê hêrişanê nîjadperest û cinsperestan ke hemverê sîyasetmedara kurde Leyla Zana kerdibî dozgerîye rê gerre kerdî û muracatêk huqûqî zî TFF’yî rê kerdî. Xeylê sazgeh, komele, Partîya Têduştî û Demokrasî (Partîya DEM), hemşaredarê qezayanê Amedî û zaf merdimî tewrê kombîyayîşê çapemenîye bîyî û pankartê “Leyla Zana rûmetê ma ya” ame akerdiş. Kombîyayîşê çapemenîye de xeylê rey sloganê “Jin Jiyan Azadî” ameyî berzkerdiş. Metnê eşkerayî hetê Hemsereka OHD’yî Ekîn Yeter Moray ra ameye wendiş.

 

Ekîn Yeter Moray dîyar kerd ke ê heqareto ke maçê futbolî yê mabêne Somaspor û Bursasporî de Leyla Zana rê ameyî kerdiş tena sey reaksîyonêko terefgiran nîyo, la sey hêrişêko rêxistinkerde ke sîstemê serdestîyê camêrdan û kodê nîjadperestîyê pîya kombenê vînenê. Leyla Zana serra 1987ine de yew awankerdoxanê Komeleya Heqê Merdiman (ÎHD) ya Amedî bîye. Meclîs de sey endama parlamentoyî xebitîyaye û pêro cuya xo ya sîyasî ya nêzdîyê 40 serran de şexsê sembolîke ya sîyasetê kurde û cinîyan bîye ke hetê parçeyêko gird ê cimatî ra ameye qebûlkerdiş. Na rewşe taybetî de, hedefgirewtişê Leyla Zana ke nika tu nakokî cimatê futbolî ra çin a û tu têkilîya aye maçî dir çin a, bi zelalî mojneno ke sloganê ke behsê înan beno hêrişanê şexsî ser nê, la nasname û aidîyetî ser o.

 

Ekîn Yeter Moray dîyar kerd ke nê atmosferê nefretî ke cayê sporî cinîyan û pêro parçeyanê cimatî ra asayîşîn nêkenê, nîno qebûlkerdiş û wina va: “No hêriş dewamîya hêrişanê hemverê aştî, demokrasî û azadîya cinîyan ê welatî yo. Nê hêrişanê hemverê Birêz Zana de, hem nîjadperestîya etnîkî û hem zî cinsperestîya ke cinîyan qij dîyena pêwa girêdayeyê. Ma, sey avûkatî, kîşte têkoşînê azadîya cinîyan hemverê nê cinsê zafhetî yê cîyayî de vindertê. Têkoşînê azadîya cinîyan her tim rayîr verê têkoşînanê xelasîya şaran, awankerdişê aştî û cimatêko demokratîk akerd. Senîn ke ma hewl danê hişmendîyêke xelasîya cinîyan keye, kuçeyan, dadgehan, merkezê tepiştişî, sazgehan û sîyasetî de awan bikerê, ma do bi perspektîfêko huqûqî yê azadîwaz têbigêrê ke na xete cayê sporî de zî awan bikerê.”

 

Ekîn Moray Yeter dîyar kerd ke înan hemverê hêrişan gerre kerdê û wina peynîya eşkerayî ard: “Wezîrê Edaletî û Wezîrê Ciwan û Sporî no peyîn raya pêroyî rê neql kerd ke hetê selahîyetdaranê edaletî, wezaret û Federasyonê Futbolî yê Tirkîya (TFF) ra hemverê terefgiranê Bursasporî ke hemverê Leyla Zana sloganê nîjadperest û cinsperest prosesê huqûqî dayê destpêkerdiş. Ma nê eşkerayîyan muhîm vînenê, labelê eşkerayîyêke dayîş û destpêkerdişê prosesî qîm nêkeno. Ganî nê prosesê ke ameyê destpêkerdiş dimayê ke demêk reaksîyonê raya pêroyî derbas bîyo, bêkar nêmanê.

 

Na çarçewa de, sey Komîsyonê Cinîyan ê OHDî, ma raya pêroyî rê pare kenê ke ma sucdarî dozgerîye rê kerd û sewbîna muracatê huqûqî TFF rê tomar kerd û ma sey avûkatê cinî, proseso ke ameyo destpêkerdiş taqîb bikerê.”