STENBOL - Rojnamegere Cîhan Bîlgîn û Nazim Daştan ê ke hêrişê SÎHAyan de ameyî qetilkerdiş, Stenbolî bi eşkerayîyêke ameyî yadkerdiş. Eşkerayîye de pabebîyayîşê rojnamegerîya aştîwazî û cigêrayîşê heqîqetî newe ra ame tekrarkerdiş û mesajê ke çapemenîya azade nîna bêvengkerdiş ame dayîş.

 

Komeleya Rojnamegeranê Cinîyan ê Mezopotamyayî (MKG), Komeleya Rojnamegeran ê Dîcle Firatî (DFG) û DÎSK Press-Îş Cîhan Bîlgîn û Nazim Daştan ê ke 19ê kanûna 2024ine de Vakur û Rojhelatê Sûrîye de bi hêrişê SÎHAyan ameyî qetilkerdiş yad kerdî. Pankartê bi nuşteyê “Çapemenîya Azade Nîna Bêvengkerdiş” salone de ame daliqnayîş.

 

‘Înan xebata xo kerdêne’

 

Saliha Aras dîyar kerd ke rojnamegerî semedo ke ê vengê xoverdayîşê hemverê propagandayê şerê taybetî de bî, hedef ameyî girewtiş û va, “Dimayê Gulistan Tara û Hêro Bahadîne, ma xebera merdişê Nazim û Cîhane girewte. Sey her kesî, ma şahidîya xebere û rojnamegerîya ke Nazim û Cîhane bi rojan taqîb kerdêne kerd. Ma Nazimî reyan Awbendê Tişrînî de dîyayne, reyan kamerayê xo ver bi hêrişanê ke sivîlan hedef gênê de gêrnayîne. Bi eynî hawayî, Cîhane, demo ke bajaranê wêrankerdeyan mojnayîne, bi rastî zî vengê heqîqetî bî, xebata xo kerdêne. Kamerayê ke wesayîtêko xirabkerde de mende delîlo tewr gird yê nê çî yê.”

 

‘Ma fek neqlkerdişê heqîqetî ra veranêda’

 

Saliha Aras dîyar kerd ke Tirkîye de her serre di rijnayîşê azadîya fikr û îfadeyî de hîna peyser şona, labelê rojnamegerî pêwa pêro tedayê edaletî zî heqîqetî vajê. Saliha Aras va, “Ma zanê ke hetê tewr muhîm ê hêrişanê hemverê ma desteserkerdişê heqê raya pêroyî yê agahîgirewtişî yo. Her serre bi desine rojnamegerî yan muhakeme benê yan zî yenê tepiştiş. Hesabanê înan yenê astengkerdiş, resayîşê xeberan sînorkerde beno. Ê benê hedef, yan zî, sey Hakan Tosun, şertanê gumanbaran de dinyaya xo bedelnenê. Ma fek cigêrayîşê edaletî semedê hevalanê xo yê qetilkerdeyan veranêdanê û ne zî neqlkerdişê heqîqetî ra veranêdanê.”

 

‘Ma nêverdenê qelemê înan bikewê erd’

 

Dima ra rojnamegare Serpîl Unal heqê qiseykerdişî girewte. Serpîl Unal dîyar kerd ke ê semedo ke waştê derheqê qetilkerdişê Nazim Daştan û Cîhan Bilgine de eşkerayîye bidê ameyê tepiştiş û va, “Nê tedayî bi ma nêeşkenê. Sebebê bîyayîşê ma nusnayîşê heqîqetî yo. Ma pêro hevalanê xo yê rojnamegeran ê serkêşî yê ke ameyê qetilkerdiş yad kenê. Ma nêverdenê qelemê înan bikewê erd.”

 

Rojnamegare Pinar Gayip dîyar kerd ke yadkerdişê rojnamegeranê qetilkerdeyan yeno manaya dewamkerdişê têkoşînê înan û va, “Sey rojnamegerî, ma bi nusnayîşê heqîqetî xeberanê xo de têkoşînê xo domnenê.”

 

Eşkerayî bi sloganê “Çapemenîya Azade Nîna Bêvengkerdiş” peynî bî.