MERKEZÊ XEBERAN - Komîsyonê Cinîyan ê Encûmenê Pawitişê Neteweyî yê Îranî derheqê rewşa tepişteyanê cinîyan ê sîyasîyan yê Zîndanê Evîne de raporêk vila kerd.

 

Goreyê raporê Komîsyonê Cinîyan ê Encûmenê Pawitişê Neteweyî yê Îranî, tepişteyê cinîyê sîyasî rewşêke zaf xirab de yê û heqê xo yê tewr bingehînan ra zî bêpar yenê verdayîş. Ame dîyarkerdiş ke berpirsîyarê zîndanî derheqê rewşa tepişteyan de agahîyan keyeyanê înan dir pare nêkenê.

 

Rapor de ame dîyarkerdiş ke nika, nêzdîyê 60 tepişteyê sîyasîyê cinî binerdê şil û nêweş ê Zîndanê Evîne de manenê û heqê xo yê tewr bingehînî ra bêpar yenê vindarnayîş. Sewbîna ame vatiş ke dermankerdişê hetê doktoranê pisporan û dermananê laziman, sewbîna şirawitişê înan semedê nêweşxaneyanê teberê zîndanî zaf sînorkerde yo. Rapor de ame dîyarkerdiş ke zaf rey waştişê dermankerdişî yê hetê tepişteyan ra yeno kerdene, red beno.

 

Peynîya raporî de ame dîyarkerdiş ke qawişê tepişteyê sîyasîyan nînê pakkerdiş û semedê zêdebîyayîşê cirdonanê mîyanê zîndanî de rîskê nêweşîyan û vilabîyayîşê înan est o. Ame dîyarkerdiş ke pêwa na rewşe zî tu tedbir semedê pakkerdişê qawîşan nêgirewtê.

 

Beşêko bînî yê raporî de wina yeno vatene: “Berê qawîşan demêko derg padaye manenê, tepişteyî bi saetan cayê girewte de manenê. Na rewşe tesîrêko xirab weşîya tepişteyanê bi emr û nêweşan keno. Rewşa tepişteyanê ke nêweşîyê kronîkî est ê hîna xirabêr keno. Heta nika berpirsîyarê zîndanî derheqê rewşa tepişteyan de tu agahî keyeyanê înan dir pare nêkerdo.