WAN - Wendekarê ke dimayê merdişê gumanbar ê Rojîn Kabaiş û Efe Kaplanî yê Zanîngeha Yuzuncu Yılî ya Wanî tewrê protestoyan bîyî, goreyê lîsteyanê “fîşkerdişî” ke hetê polîsan ra ameyê dayîş, wargehanê xo ra vetişî dir rî bi rî yê.

 

Rojîn Kabaîş, wendekara Zanîngeha Yuzuncu Yıl a Wanî, 27ê Êlûlê 2024ine de vînî bîye. Dimayê cigêrayîşê 18 rojan, cenazeya aye 15ê Teşrîna Verêne de qeraxê Gola Wanî taxa Molla Kasim de ameye dîyayene. Wendekarê zanîngehe hemverê merdişê gumanbar ê hem Rojîn Kabaîş û hem zî Efe Kaplanî kampus de nêrazîbîyayîş mojna û hêrsê xo yê hemverê nêdîyayîşê sucdaran ardî ziwan.

 

Goreyê raporê Rojnameyê Evrenselî, “lîsteya kesê ke ameyê destbendkerdişî” ke hetê Daîreya Polîsan ê Bajarê Wanî ra ame viraştiş, wargehê KYKî (Îdareyê Wargehê Wendekaran) rê ame şirawitiş. Goreyê nê lîsteyan, îdareyê wargehan dest bi vengdayîşê wendekaran bi hawayêko ferdî kerdê ke semedê pawitişê xo bikerê.

 

Belgeyanê ke wendekaran rê ameyê şirawitişî de rayîrşîyayîş û protestoyê ke 19ê teşrîna peyêne 2024ine de kampus de ameyê organîzekerdiş, sey sebeb ameyê dîyarkerdiş. Belgeyanê ke raporê polîsan ser o ameyê girewtişî de, tometê sey “tewrê kerdişêko bêqanûnî de bîyayîş”, “rayîrê trafîkî rê astengkerdiş” û “hemverê memurê edaletî de xoverdayîş” est ê.

 

Wendekaran ame waştene ke goreyê madeyê 24-c yê “Rêziknameyê Xizmetê Wargehan”, ke tometanê sey “hemverî, heqaretkirdiş yan zî hêrişê fîzîkî yê hemverê hêzanê asayîşî yê dewlete” hewêneno, pawitişê xo pêşkêş bikerê. No madde eşkeno raste rast bibo sebebê vecîyayîşê wendekaran yê wargehî.