Evîn Çîftçî

 

RIHA - Hemsereka Egîtîm Senî ya Rihayî Ozlem Ulutaş Şengul dîyar kerd ke tutî binê şert û mercanê bêasayîşî de perwerde vînenê û va:

 

“Têkoşînê ma yê semedê perwerdeyêko demokratîk, laîk, bêpere û bi ziwanê dayîke do her tim bidomîyo.”

 

Peymana Heqê Tutan ê Neteweyê Yewbîyaye ke Tirkîya zî terefgirê ci ya, dîyar kena ke heqê ciwîyayîşê her tutî esas o û pîlî semedê pawitişê cuya tutan berpirsîyar ê. Eynî wextî de peymane dewletan semedo ke tutî zîrar nêvînê heme tedbiran bigîrê berpirsîyar qebul kena. Lê ma vînenê ke Tirkîya de na peymane tenya kaxidan ser de manena. Roj bi roje kiştişê tutan, şîdetê tutan ser zêdeyêr beno.

 

Hemsereka Egîtîm Senî ya Rihayî Ozlem Ulutaş Şengul derheqê babete de ajansê ma rê qisey kerd.

 

‘Semedê hedîseyê ke yenê ciwîyayîş zemîn awan kenê’

 

Ozlem Ulutaş Şengul dîyar kerd ke aşma peyêne de Riha de 4 tutê karkerî dinyaya xo bedelnayê û problemê krîzê ekonomî û sîstemê perwerdeyî benê sebebê ke tutî dinyaya xo bibedelnê. Ozlem Ulutaş Şengul wina ard ziwan: “Tutê ke ganî şêrê mekteban, sey hêzê erjan ê karî binpaykerdişê kede de şertê bêasayîşî de şuxilênê û nê şert û mercê bêasayîşî benê sebebê mergê tutan. Nê tutê ke ganî hevalanê xo dir mektebî de binê asayîşî de û perwerdeyêko weş bivînê, semedê şert û mercê cuya bêîmkanî mecbur karî yenê kerdiş û nê şert û mercî zî semedê hedîseyanê bi nê rengî zemîn awan kenê.”

 

‘Ganî şertanê bi asayîşî de perwerde bivînê’

 

Ozlem Ulutaş Şengul dîyar kerd ke ganî tutî şert û mercanê bi asayîşî de perwerde bivînê û wina peynî ard: “Tuto bi nameyê M.K rojê peyênî de wareyê stajî de dinyaya xo bedelnaye. Tutî şertanê bêasayîşî de şuxilênê. M.K wendekarê MESEMî bî. Hewtede 4 rojan şîyêne wareyê karî, rojêke zî şîyêne mekteb. No formulêk Wezaretê Perwerdeyî ke semedê betaliye awan kerdo. Tutê emrê mektebî de binê nameyê çiraxtî de kargeran de yenê şuxilnayîş. Kontrolê nê wareyan weş nêbeno. M.K wareyê karî de rastê şîdetî ame û dinyaya xo bedelnaye. Vernîya heme çîyan ganî tutî binê şert û mercanê bi asayîşî de perwerde bivînê. Ganî dewlete heme şert û mercanê derheqê perwerdeyî de kontrol bikero.”

 

‘Têkoşînê ma do dewam bikero’

 

Ozlem Ulutaş Şengul peynîya qiseykerdişê xo de semedo ke tutî heme heqanê xo ra fayde bigîrê, venga têkoşînê hempar komelî rê kerd û wina peynî ard: “Rexneyê ma yê pê yeno na babeta pê yena ya. Wexto ke şert û mercê bi asayîşî bêrê awankerdiş, mergê tutanê karkeran do werte ra bêro wedaritiş. Ganî tu tutêko 16 serre înşaatan de nêşuxilîyo. Ganî no bêro astengkerdiş. Ma sey Egîtîm Senî na babete de semedo ke tutî perwerdeyêko zanistî, demokratîk, bêpere û bi ziwanê dayîke bigîrê, têkoşînê xo ma do dewam bikerê.”