ŞIRNEX- Îdarekarê MEBYA-DER, DEM Partî, DBP û rêxistinanê demokratîk û aktîvîstê TJA’yî bi girseyî şî şînê şervana YPJ’yî Derya Çaglar.

 

Şervana Yewîneyê Pawitişê Cinîyan (YPJ) Derya Çaglar (Arjîn Botan) 22ê Çeleyê 2024ine de şaristanê Tebqa yê Vakur û Rojhelatê Sûrîye de dinyaya xo bedelnabî. Keyeyî seba kênaya xo tezîye ronaye. Endam û rayberê MEBYA-DER’î, endam û rayberê partîyanê sîyasî, sazgehê komelê demokratîk û xeylê welatijî bi girseyî şî tezîye û keyeyê rê serweşîye waşte. Girseyo ke vernîya awanîya DEM Partî ya Hezexî de kom bi, heta taxe sloganê ‘Şehîd namirin’ vat.

 

Dima girse resa cayê tezîya û seba cangorîyanê azadîye rêze girewte û dima Hemsereka MEBYA-DER’î ya Şirnexî Emîne Erkuş keyeyî rê serweşî waşt û vat do her tim taqîbkerdoxê şehîdan bibê.

 

Hemsereka DEM Partî ya Hezexî Songul Erdene zî dîyar kerd ke do rêça cangorîyanê azadîye ser o bî. Parlamenterê DEM Partî yê Şirnexî Mehmet Zekî Îrmez zî keyeyê Derya Çaglar û heme şarê kurdî rê serweşîye waşt û wina vat: “Têkoşînê ma bi saya cangorîyanê ma ameyo daraxêko muhîm. Prosesê ewroyî ke ma tede yê, bi têkoşînê cangorîyanê ma awan bîyo. Ma do tewrê heme astengîyan zî xover bidê û têkoşînê înan ver bi serkewtişî berê. Seba serkewtişê nê prosesî ganî ma xo hîna zaf rêxistin bikerê. Ma reyna vanê ke sereyê Rayber Apo û hemrayanê aye weş bo.”

 

Qiseykerdişan ra pey bi wendişê duayan tezîye qedîyaye.