RIHA - Şaredarîya Hewagî lokantaya şarî akerd û nê dir cinîyan rê wareyê îstîhdamî ame akerdiş û xebatkarê lokantayî cinî yê. Fatma Çakmak ya ke xebatkara lokantayî ya wina va: “Ma wazenê zêdeyêr xebatanê cinîyan bivînê, ma wazenê cinî zêdeyêr wareyan de bêrê vînayîş.”

 

Partîya Têduştî û Demokrasî (DEM Partî) weçînayîşê 31ê adara 2024ine de Kurdistan û Tirkîya de zaf şaredarî bidest kerdî. Dimayê ke şaredarîyê DEM Partî dest bi wezîfe kerdî semedê cinîyan xebate domnayî û ware akerdî. Yew înan ra şaredarîya Hewagî ya Rihayî ya. Şaredarîya Hewagî semedê cinîyan wareyê îstîhdamî viraşt û 18ê sibate de lokantaya şarî akerd û xebatkarê aye cinî yê.

 

Xebatkara lokantayî Fatma Çakma ser muhîmîya xebatkarê cinîyan ê lokantayî û karê rojaneyî de qisey kerd.

 

‘Ma wazenê hîna zêdeyêr cinî wareyan de bivînê’

 

Fatma Çakma ard ziwan ke hemşaredara Hewagî Ayşegul Kapikayali semedê cinîyan wareyê îstîhdamî viraşt û înan nê ra hêz girewt. Fatma Çakmak wina dewam kerd: “Pêroyê roje de ma hevalanê xo dir bi keda cinîyan tîya 150-300 kesan rê werd virazenê. Destpêk de muşterîyê cinî no ca tercîh nêkerdêne. Dima ra muşterîyê cinî, hevalê esnafî ameyî tîya û piştgirîyê ma dayî. Wext de werdê ma zaf ame ecibnayîş û ma pîroz kerdî. Destpêk de eleqe kêm bî. Wextî dir ame eşnawitiş. Ma hîrê cinî tîya werd viraştêne. Werdê ma rîpelê şaredarî de ame parekerdiş. Bi piştîdayîşî şaredarî hevalê ma yê cinî teberê lokanta de zî dest bi xebate kerd. Ma wazenê hîna zêdeyêr cinî wareyan de bêrê vînayîş.”

 

‘Ma bi ekîpê plankerde xebitênê’

 

Fatma Çakmak dîyar kerd ke lokanta de xebatêk komun domnenê û wina ard ziwan: “Ma serê siba şorbaya nîskan virazenê. Hevalê ma bi 20 TL ci ra feyde girewtêne. Nîmeroj werdê ma saete 12ine de vejêno. Ma her roje werd vurnenê. Heta 14.00ine serwîsê werdê ma est o. Ma plankerde xebitênê.”

 

‘Ma ameyoxê xo awan kenê’

 

Fatma Çakmak ard ziwan ke cinî biwazê eşkenê her çîyî bikerê û va ganî heme cinî xo aver berê. Fatma Çakmak wina peynî ard: “Wa heme cinî ser lingê xo vinderê. Cinî xurt ê. Wa bi hêzê xo bawer bikerê. Cinî biwazê eşkenê her çîyî mumkin bikerê. Ganî ma xo aver berê, ameyoxê xo awan bikerê.”