Gulîstan Gulmuş-Evîn Çîftçî

 

RIHA - Endamê keyeyî ke Rayberê Şarê Kurdî Abdullah Ocalanî dir pêvînayîş kerdî, dîyar kerdî ke “Xoverdayîşê ci moralê ma berz kerdo.” Sewbîna waştişê xo yê semedê pêvînayîşê zêdeyê Abdullah Ocalanî dir ardî ziwan û vatî: “Ma azadîya fîzîkî ya Rayberî û heme tepişteyan wazenê.”

 

Rayberê Şarê Kurdî Abdullah Ocalan 31ê Teşrîna Verêne de keyeyê xo dir pêvînayîş kerd. Bi eşkerayîyêke ke Buroyê Huqûqî yê Asrînî bi hesabê xo yê Xî weşana, ame vatene ke endamê keyeyî Fatma Ocalan, Berfîn Ocalan, Alî Ocalan û Omer Ocalan semedê pêvînayîşê Rayberê Şarê Kurdî dir şîyê Girawa Îmrali.

 

Endamê keyeyî Fatma Ocalan û Berfîn Ocalan JINNEWSî rê derheqê pêvînayîşî de qisey kerdî.

 

‘Ez wina heyecan bîya ke nêeşkeya qisey bikerî’   

 

Fatma Ocalan dimayê 11 serran serdanê birayê xo Abdullah Ocalanî kerd û hîsê xo pare kerd. Fatma Ocalan va: “Mi vatêne qey êdî nêeşkena Rayberî bivîna, la ez şîya û mi o dî. Şikir Homayî rê, o baş bî û silamanê xo heme kesî rê şawit. O mi kerd verike xo û destê xo da milê mi ser. Moralê ci berz bî. O pîr nêbi, o ma ra weşêr bi û ma ey weş dî. O ma dir fotografêk ant. Elî, Omer û Berfîn zî şî. Ma çar kesî pê dir şî zere. Serekî va: ‘Wa Fatma mi dir bêro,’ ez zî şîya. Wexto ke ma qisey kerd, ez heyecan bîya. Serdayîşê verêne de, semedê problemanê weşîye nêverdayî ez bikewî zere, vatêne ez eşkena zehmetîyan virazî. Eke newe ra veng bido ez eşkena şêrî. 3 rey mi ko kerd.”

 

‘Ey mi zaf kêfweş kerd’  

 

Berfîn Ocalan, yew endama keyeyîya ke tewrê pêvînayîşî bî, wina va: “Ma pêvînayîş kerd û atmosferêk cîya bî. Mi semedo ke reya verêne ey dî zaf kêfweş bîya. Moralê ci zaf weş bî û hetê fîzîkî ra zî zaf weş bî. Ma saetêk û nîm pêvînayîş kerd; ey saetêk bi kurdkî, dima ra nîm saete tirkî ma dir qisey kerd. Nê demî de, ey bi zafê xo dapîra mi Fatma dir qisey kerd û derheqê vîrardişê tutîtîye ser o qisey kerd. O tim huya ke moral û hêzêk zêdeyî da ma. Ey mi ra va ke ez do erjê keyeyî bipawî û girêdaye bimanî. Ey qelemêk sey diyarîyêk da mi ke mi zaf kêfweş kerd. Bi rastî zî atmosferêk zaf cîya bî.”

 

‘Ma azadîya fîzîkî ya Rayberî û heme tepişteyan wazenê’

 

Berfîn Ocalan va ke ê wazenê xeylêk rey Rayberê Şarê Kurdî dir pêvînayîş bikerê û va: “Ma azadîya fîzîkî ya Rayberî û heme tepişteyan wazenê. Vindertişê ci yê xoverdayîşî û moralê ci yê berz moralê ma berz kerd. Ey silam heme kesê ke persê ey kenê rê şawit û şarî rê zî…”

 

‘O zaf kêfweş bi, bi amayîşê raywananê azadîye ke ameyî Amara’

 

Berfîn Ocalan va ke rayîrşîyayîşê ke Têgêrayîşê Cinîyanê Azadan (TJA) 1 û 7ê Teşrîna Verêne Amed ra heta Anqara bi sloganê “Ma bi hêvî ver bi azadîye şonê” organîze kerd, Abdullah Ocalan zaf kêfweş kerdo û va: “O zaf kêfweş bîyo ke raywanê azadîye 1 û 7ê Teşrîna Verêne ameyî Amara û aye nê çî ard ziwan. ‘Bi taybetî zî kêfweş bî ke hevalê cinî na çalakîye organîze kerdê. Wexto ke ey nê çî qal kerd, timî huya.”