MERKEZÊ XEBERAN – Roya Sabit, hemwelatîya Bahaî ke Yewîya Emîrtîyê Ereban de ciwîyena, hetê Dadgeha Şorişî ya Şîrazî ra bi 25 serrî cezaya zîndanî û cezayanê bînan ameye mehkûmkerdiş. Pey tesdîqkerdişê qerarî, Roya Sabit berdîya Zîndanê Adelabadî.

 

Destbendkerdişê Roya Sabite

 

Roya Sabit, ke Yewîya Emîrtîya Ereban de ciwîyena, keyeyê birayê xo yê Şîrazî de hetê yewîneyê asayîşî ra ameye destbendkerdiş û berdîya Zîndanê Adelabadî yê Şîrazî. Qerarê Dadgeha Şorişî ya Şîrazî ya 25 serrî cezaya zîndanî û cezayanê bînan, hetê Dadgeha Temyîzî ya 37ine ya Bajarê Farsî ra zî ameye tesdîqkerdiş.

 

Sûcdarîya “Hemkarîya Îsraîlî dir”

 

Goreyê qerarê dadgehe, Roya Sabit semedê sûcanê “hemkarîya bi kes û sazgehanê ke dewleta Îsraîlî dir girêdayî yê” û “awankerdiş û îdareyê komêke semedê çalakîyanê ke hemverê asayîşê welatî yê” her yewî ra 10 serrî cezaya zîndanî girewte. Sewbîna semedê “propagandaya mezhebî ya ke hemverê şerîetê Îslamî ya” 5 serrî cezaya zîndanî ci rê ameye birnayîş.

 

Cezayê bînî: Betalkerdişê pasaportî û qedexeyê komelî

 

Çarçewaya cezayanê bînan de, pasaportê Roya Sabite ame betalkerdiş, 2 serrî qedexeyê vejîyayîşê teberê welatî û 5 serrî qedexeyê heqanê komelî ci rê ame dayîş. Sewbîna, çalakîyê aye yê înternet û medyaya dîjîtalî ser o zî ameyî qedexekerdiş.

 

Semedê ewnîyayîşê dayîk û babî xo şîbî Îran

 

Roya Sabit, ke nêzdîyê 23 serrî Yewîya Emîrtîyê Ereban de ciwîyayîne, 4ê çeleyê 2024ine de semedê ewnîyayîşş dayîk û babî xo yê nêweş û îxtîyarî şîbî Şîraz. La wextê serdayîşî de hetê yewînanê Îstîxbaratê Pasdaranê Şorişî ra ameye destbendkerdiş.