RIHA - Wextê kolnayîşê keleya Rihayî de mozaîkêk erdî bi nuştişê Grekî ame dîyayîş. Mozaîk ke fîguranê nebat û heywanan û motîfanê ke sembolê çar beşan ê mojneno, roşnî dano serdemê vernî yê Xiristîyanîya herême ser.

 

Wextê kolnayîşê keleya tarîxî ya Rihayî de başûrê Gola Maseyanê Rihayî de mozaîkêk erdî yê seserra 5ine bi nuştişê Grekî ame dîyayîş. Mozaîko ke fîguranê nebat û heywanan û motîfanê geometrîkî mojnenê, tarîxê ci keweno serra 460-495 VZ.

 

Goreyê raporê çapemenîye, îdareya kolnayîşî Prof. Dr. Gulriz Kozbe eşkera kerd ke mozaîkî belkî aîdê dêrêk, şapelêk yan zî şehîdxaneyêk bo. Nuşte qalê Kont Anaskas û keyeyê ci keno ke endamêk elîta leşkerî û dînî yê ê serdemî bî û mozaîk sewbîna motîfanê kozmîkî zî nîşan dano ke sembolê hewa, awe, erd û adirî yo. Gulriz Kozbe qetî kerd ke gorî eynî serdemî zî herême de ameyê dîyayîş û no vînayîş semedê resnayîşê pratîkanê dînî yê serdemê vernî yê Bîzansî nîşananê muhîman pêşkêş keno.

 

Yeno dîyarkerdiş ke restarosyonê keleya ke erdlerzê 6ê sibata 2023ine de zirar dî, do peynîya serra 2026ine de biqedîyo û dima ra do semedê meymanan bêro akerdiş.