MERKEZÊ XEBERAN - ÎHD’yê Wan, Riha û Îzmîrî derheqê averşîyayîşê peyênanê dosyaya merdişê biguman ê Rojîn Kabaîşe de eşkerayîyêk da û waşt ke heme dewanê merdişê cinîyan, bi taybetî dewaya Rojîn Kabaîşe, lezkî û bi bandor bêrê cigêrayîş.

 

Komîsyonê Cinîyan ê Merkezî yê Komeleya Heqanê Merdiman (ÎHD), Wan, Riha û Îzmîr de semedê Rojîn Kabaîşe kombîyayîşê çapemenîye viraşt.

 

Riha

 

Şubeyê ÎHD’yê Rihayî awanîya komele de semedê Rojîn Kabaîşe kombîyayîşê çapemenîye viraşt. Xeylê pawitoxê heqanê merdiman tewrê çalakîye bîyî. Hemsereka Şubeyê ÎHD’yê Rihayî Songul Arpa nameyê beşdaran ser o eşkerayîye wend.

 

 

Îzmîr

 

Îzmîr de, endamê Rêxistina Qezaya Karşiyakayê Îzmîrî ya Partîya Têduştî û Demokrasî (DEM Partî) û xeylê cinîyan tewrê eşkerayîyêk bîyî ke awanîya şubeyê ÎHDyê Îzmîrî de ame viraştiş. Eşkerayîya ke pankartê bi nuşteyê “Edalet ji bo Rojînî” estbî, hetê endama Heyetê Îdareyê Komîsyonê Cinîyan ê Şubeyê ÎHDyê Îzmîrî Nazlî Turan ra ame wendiş.

 

 

Wan

 

Şubeyê Komela Heqanê Merdiman (ÎHD) ya Wanî derheqê hedîseyanê peyên ê dosyaya mergo biguman ê wendekara Unîversîteya Yuzuncu Yilî ya Wanî Rojîn Kabaîş de awanîya xo ya qezaya Rêya Armûşî ya Wan de eşkerayîyêk daye. Hemserekê ÎHD’yî yê Wanî Ayten Kiran û Mehmet Salîh Coşkun û rayberê ÎHD’yî beşdarê eşkerayî bîyê. Metnê eşkerayî hetê hemsereka Şubeyê ÎHD’yî ya Wanî Ayten Kiran ra ame wendene.

 

Ayten Kiran dîyar kerd ke cinî Kurdîstan de rastê şîdeto neteweyî û cînsîyetî yenê û da zanayene ke herinda eşkerakerdişê sebebanê rastîn ê babeta cinîyan, mekanîzmayê dewlete û ATK’yî raporê ke xizmetê pawitişê sucdaran kenê, virazenê, keyeyan bêçare verdanê ke bi serran paweyê edaletî bimanê.

 

Ayten Kiran vengda Wezaretê Edaletî, ATK, Komîsyonê Heqanê Merdiman ê Meclîsî, Baro, Merkezê Heqanê Cinîyan û heme rêxistinanê sîvîl û waştişê xo wina rêz kerdê:

 

“*Ganî heme dosyayê mergê cinîyan, bi taybetî dosyaya Rojîn Kabaîş ser o, bilez û hîna hîra cigêrayîş bêro kerdene.

 

* Ganî Sazgehê Tibê Edlî wezîfeyê xo yo sey yewin rayedarîya belgekerdişê şîdetî, kiştişê cinîyan û îşkenceyî ra bêra vetene û ganî telîmatnameyê qanûnî bêrê ronayene seba ke raporê doktor û nêweşxaneyanê xoser goreyê qeraranê Mehkemaya Heqanê Merdiman a Ewropayî sey delîl bêrê qebulkerdene.

 

* Ganî Peymana Stenbolî newe ra bêra îmzakerdene û heqê cinîyan ê pawitişî û heyatî bêrê garantîkerdene.

 

* Ganî polîtîkayê bêcezatî biqedîyê û kiştişê cinîyan çarçewaya berpirsîyarîya sucdar û dewlete de biasîyê.

 

* ÎHD do têkoşînê cinîyan ê seba heqanê heyatî bidomno û waştişê edaletêko heqdar, şeffaf û tesîrdar vera kerdişanê dişmenî yê hemverê cinîyan ê dewşete, ATK û mekanîzmayanê edaletî berzêr bikera.”

 

Wendişê metnê hemparî ra pey eşkerayî qedîyaye.