ANQARA - Meclîsê Cinîyan ê DEM Partîye reaksîyon vera verpaykerdişê vatişanê sîyasetmedaranê cinîyan ê kurdan û hedefgirewtişê înan da û va: “Serdemêk ke hêvîya aştiye zêde bena, hedefgirewtişê sîyasetmedaranê cinîyan bi vatişanê faşîstan, çîyêk tesaduf nîyo.”

 

Meclîsê Cinîyan ê Partîya Têduştî û Demokrasî (DEM Partî), sere de vatişanê Şaredarê Boluyî Tanju Ozcanî ke Serekwezîra Koma DEM Partî Gulistan Kiliç Koçyîgîtî hedef girewtbî, derheqê hedefgirewtişê sîyasetmedaranê cinîyan ê kurdan de eşkerayîyêke nuşteyî weşan kerd.

 

Na eşkerayîye Meclîsê Cinîyan ê DEM Partîye de wina ame vatiş: “Yê ke bi sûrbîyayîşê nîjadperestî, cinsperestî û netewperestî hêrişê sîyasetê ma yê cinîyan kenê, wa baş bizanê ke cinî destê kombîyayîşê dorê prosesê Aştî û Cematê Demokratîkî nêverdê.

 

Wextêk ke hêvîya aştiye ya cinîyan û şaran zêde bîya, tesaduf nîyo ke bi vatişanê faşîstan hêrişê sîyasetmedaranê ma yê cinîyan bêro kerdîş. Yê ke xo sîyasetê şerî wey kenê û bi îdeolojîyanê faşîstan ê serwerîya mêrdan hêrişê waştişê aştîye yê şaran û cinîyan kenê, ê hêzê yê ke hewl danê şaran bifînê yewbînan û rantê şerî bikerê.

 

Semedê nê, bi destê rayberanê sîyasetê serwerîya mêrdan ê faşîstî, vatişanê sîyasetmedaranê cinîyan ê ser aştîye verpay kenê û hevalê ma hedef kenê. Operasyonê xapinayîşî ke bi ziwanê nîjadperestî yenê kerdiş, sûcêk vernîya cematî û bi taybetî zî vernîya cinîyan o.

 

Ma hemverê nê hêrişanê hêvîya aştîye ya cematî ser û cinîyan bêveng nêmendî, ma do bêveng nêmanê. Ma do her cayê ke tîya de yê têkoşînê xo yê vernîya faşîzmî zêde bikerê û israrê xo yê aştiye de dewam bikerê. Faşîzm nê, la têkoşînê aştîye yê cinîyan do ser bikewo.