ÎZMÎR - 1ê teşrîna verênê de akerdişê meclîsî dir cinîyan derheqê rojeva sîyasî û komelî yê welatî de ercnayîş kerdî. Cinîyan meclîs ra waşt ke semedê ke aştî bibo, vernîya şîdetê cinîyan ser bigîrê û krîzê ekonomî bêro çareserkerdiş, polîtîkayê çareserî bêrê averberdiş.

 

Meclîs 1ê teşrîna verêne de abî. Cinîyê ke taxanê Konakî yê Îzmîrî de ciwîyenê, derheqê problemanê ke yewser tesîrê cuyê înan ser o de kenê de qisey kerdî û vatî ke vengdayîşê Rayberê Şarê Kurdî Abdullah Ocalanî ke 27ê sibate de kerd, muhîm o. Cinîyan va ke lazim o rojeva esasî ya meclîsî şîdetê cinîyan, feqîrî û têduştîya temsîlkarîyê sîyasetî ser o bo.

 

‘Milê cinîyan ser o barêk pîl esto’

 

Dîlan Yilmaz dîyar kerd ke krîzê welatî tewr zaf tesîr cinîyan ser o keno û wina va: “Şer sebebê tewr pîl ê feqîrî yo. Nika Fîlîstînî de şer dewam keno û barê tewr pîl cinîyan ser o. Cinîyê ke xebate kenê, hem keye de hem zî teber de xebate kenê. Tutanê xo ewnîyenê. Problemê ekonomî ciwîyenê. Bi şîdetê psîkolojîk rî bi rî manenê. Nê semedî ra rojeva cinîyan de şîdet û feqîrî est a. Ma cuyêk aştîyane wazenê. Lazim o meclîs de feqîrî û problemê debarî bêro qalkerdiş. Ma raya xo danê parlamenteran. Lazim o ê zî bibê vengê ma. Lazim o gaman bierzê. Ma cuyêk aram û aştîyane wazenê.”

 

‘Ma aştî wazenê la yew het nêbeno’

 

Hacîre Alp va ke verê vernê de lazim o problemê ekonomî bêro çareserkerdiş û wina va: “Merdim na babete de zaf zehmetîyan anceno. Her roje cinî qetil benê. Lazim o dewlete vernîya nê bigîro. Lazim o nê ser de vindero. Lazim o cuye merdiman wina erjan nêbo. Ma wexto ke na hedîse vînenê xemgîn benê. La çîyêk destê ma ra nîno. A cinîya ke nê cuyaya, beno ke siba zî ma biciwîyê. Ma aştî wazenê. La yew het nêbeno.”

 

‘Waştişê ma yo pîl azadîya serekê ma ya’

 

Cinîya bi nameyê Hanim Akyuz va ke wazenê berê aştîyê abê û wina va: “Lazim o xebatê meclîsî nê hetî de bê. Ma wazenê tutê ma, ciwanê ma aştî bivînê. Wa zehmetîyan nêancê. Wa şer nêvînê. Ma azadîya Abdullah Ocalanî wazenê. Waştişê ma yo tewr pîl azadîya serekê ma ya.”

 

‘Hêvîya ma aştî ya’

 

Sultan Ugur va ke waştişê tewr pîl ê cinîyan aştî ya û wina va: “Tepişteyî bêsebeb tepişte yê. Lazim o no meclîs de bêro qalkerdiş. Ma cinîyê kurdî aştî wazenê. Hêvîya ma aştî ya. Ma şer nêwazenê. Ma wazenê kurdî û tirkî yew bibê. Ma wazenê bibê wayîrê statu. Wa zordarîyê ma ser o wedarîyê.”

 

‘Lazim o Kurdî bibê wayîrê statu’

 

Saviya Seyhan va ke ê meclîs ra aştî wazenê û nê ercnayîşî kerd: “Problemo tewr pîl krîzê ekonomî yo. Her çî vay o. Ma nêeşkenê çîyêk bigîrê. Ma xebate kenê la rewşa ma baş nîya. Lazim o kurdî bibê wayîrê statu.”

 

‘Wa kurdkî bibo ziwanê fermî’

 

Rahîme Kahraman wina va: “Ma cuyêk têduştî wazenê. Waştişê ma meclîsî ra aştî yo. Lazim o her kes têduşt bo. Wa kurdkî bibo ziwanê fermî. 26 serrî yo ez tîyaya la nêeşkena şîrî doktor û qisey bikerî. Hînî mi dir yenê. Semedo ke ez nêeşkena cewab bidî. Ma şer nêwazenê. Wa dayîkî nêbermê. Wa meclîs de aştî bêro qalkerdiş.”

 

Emîne Gedîk bale ant krîzê ekonomî ser û şîdetê mêrdan ê cinîyan ser û va: “Debara ma nêbena. Sewbîna lazim o qetilkerdişê cinîyan rojeva meclîsî de bibo. Ma bi temamî baş nîyê.”

 

‘Lazim o tîryakî bikerê rojeva xo’

 

Kamîle Akman va ke demê peyênî de şuxilnayîşê tîrtakî zêde bîyo û wina va: “Lazim o meclîs nê çî bikero rojeva xo. Gelo ciwanî çira întîxar kenê? Ciwanî çi şuxilnenê, çi şimenê? Çara yeno? Pere çara qezenc kenê? Kes vernîya nê nêgîno. Tutî pereyê destê dayîkanê xo gênê û benê danê tiryakî. Her cayî de merg est o. Ma aştî wazenê. Aştî bibo dinya zî weş bena.”