AMED - Cinîyanê ke semedê heqê hêvîye rayra şîyê, azadîya fîzîkî ya Rayberê Şarê Kurdî Abdullah Ocalanî waştî.

 

Platformê Sazîyanê Demokratîkan, Amed de semedê bal antişê serê “heqê hêvîye” ya Rayberê Şarê Kurdî Abdullah Ocalanî, bi şîarê “Ma semedê heqê hêvîye ya Rayberê Şaran hetê azadîye ser o rayra şonê” rayraşîyayîşêk viraşt.

 

Cinîyanê ke tewrê rayraşîyayîşî bîyî, fîkîrê xo seba ajansê ma JINNEWS’î rê ardî ziwan.

 

‘Ma Rayberê xo ra bawer kenê’

 

Muşeyyer Ulker: 27ê Sibate de, Rayberê Şarê Kurdî Abdullah Ocalanî veng da yew komelê demokratîkî û aştîye û ma zî bîyî vengê aştîye. Ma aştîye wazenê; gereko her kes game biavêjo. Çiqas ke ê şarê kurdî texsîr bikerê, têkoşînê ma zî êdî pîl beno. Êdî ke adir kewt zerrîya înan, Rayberî înan rê va ke wa wayîrê nê prosesê aştîye bivejîyê. Çend aşmî yo, hetê bînî ra tu game nêeşta û înan yew çekuye zî nêeşnawita. Yew hîkayeya hêvîye est a ke prosesê aştîye do bêro ca. Ez hetê bînî rê bawer nêkena, la ez Rayberî rê bawer kena. Bawerîya mi bi nê têkoşînî est a. Bawerîya mi bi têkoşînê ke 50 serrî yo dewam keno est a. La ewro, bawerîya mi bi înanê ke tersenê û nêeşkenê game biavêjê çin a.”

 

‘Ganî Rayberê ma azad bo’

 

Nafîa Yîgît: Ma vanê edî bes o. Gereko her kes bibo yew, destanê yewbînan bigêrê û hetê aştîye ser o game biavêjê. Ma zî sey her kesî azadîye wazenê. Ma wazenê ke tecrîdê serê Rayberê Şarê Kurdî Abdullah Ocalanî bêro wedaritene; ma serbestveradayîşê ey wazenê. Ewro Meclîsî rê vengdayîşêk ame kerdene; gereko her kes vengdayîşê xo qebul bikero. Ma dewlete rê veng dane; wa destê xo dergê azadîye bikerê. Ma do têkoşînê xo bidomnê heta ke azadîye bigîro nê erdan. Ma do destê xo dergê azadîye bikerê heta ke Rayberê kurdî azad bibo. Ma her kesî rê veng danê ke prosesê aştîye bidomno.”

 

‘Ma do Sûr de dorê Rayberê xo de kom bê’

 

Saygul Gerîcî: Konseya Ewropa kom bîye û ma zî semedê azadîya fîzîkî ya Rayberê Şarê Kurdî Abdullah Ocalanî xo ver danê. Bi îznê Heqî o do azad bibo. Ez zaf heyecan bîya. Yew roje o do bivejîyo serê bedenanê Amedî û ma do dormeyê ey de bêrê têhet û ma wazenê ey bivînê. Birayê mi zîndan de yo; nika hezar û 700 serrî ceza dewa ci de birîyaya. Eke ê rayberî veradê, ê do birayê mi zî veradê.”

 

‘Aştîyêka bi rûmete wazenê’

 

Medya Aydemîr: Ma veradayîşê înanê ke behsê aştîye kenê wazenê. Coka ma tîya de yê. Êyê ke behsê prosesê aştîye kenê zîndanan de yê; azadîye bi nê hawayî nîna destvistene. Semedê aştîyêka bi rûmete, gereko Rayber azad bo û hetê fîzîkî ra azad bo. Gereko bieşko fîkîranê xo biresno şarî.