
Wan ra waştişê peynîkerdişê tecrîdî
- 09:46 27 Tebaxe 2025
- NAROJANE
Neslîhan Kardaş
WAN - Cinîyê ke 23yê tebaxe de Wan de beşdarê mîtîngê bi sloganê "Azadî do bi ser bikewo, tecrîd nê” bîy, derheqê tecrîdê Rayberê Şarê Kurdî Abdullah Ocalanî ser o vatî: "Heta tecrîdo ke Birêz Abdullah Ocalanî ser o nêro wedaritiş û tepişteyê sîyasî nêrê veradayîş, aştî nêvirazêna."
Derheqê prosesî de xeylêk bajaranê Kurdistanî û Tirkîya de çalakî, rayîrşîyayîş, kombîyayîş û mîtîngî yenê organîzekerdiş. Wan de zî eynî çarçewa de mitîngêk ame organîzekerdiş û cinîyê ke tewrê mîtîngî bî, fikrê xo ajansê ma JINNEWS'î rê pare kerdî.
'Semedo ke aştî pê bêro ganî tecrîd wurzo'
Amîne Demîr, 23yê Tebaxe de tewrê mîtîngî bî û wina fikrê xo ard ziwan: "Ganî tepişteyê sîyasî bêrê veradayîş. Çimê pêro dayîkan rayîr de yo. Wa êdî îşkence çinbo û wa kes nê rayîrî de nêmiro. Ma nêwazenê kes bimiro. Ganî Serekkomar Recep Tayyîp Erdogan zî çareserîyêk peyda bikero. Heta ke tecrîdê Birêz Abdullah Ocalanî ser o nêro wedaritiş û tepişteyê sîyasî nêrê veradayîş, aştî nêvirazêna. Semedo ke na game nêamî eştiş, ma nêeşkenê bawerîya xo bi prosesî bîyarê. Hema zî averşîyayîşêk verbiçim çin o, nê semedî ra ma nêeşkenê bawerîya xo pê bîyarê. Senîn ke gerîlayan fedakarî kerd û çekê xo dayî ro, ganî dewlete zî eynî fedakarî bikero ke ma bawerîya xo bi prosesî bîyarê. Eke tecrîd bêro wedaritiş, aştî eşkena pê bêro.
'Ganî Birêz Ocalan azad bibo'
Gulistan Kapalak zî bale ant waştişê aştî ser û va, "Wa aştî pê bêro û wa zerrîya tu dayîkan reyke bîn nêdejo. Êdî bes o. Nê merdiman bedelê giran dayî û xeylêk dej antê. Wa nika aştî pê bêro. Ma aştî wazenê, la hema zî bawerîya ma bi prosesî çin a. Wa tecrîdê Birêz Abdullah Ocalanî ser o peynî bibo û wa azad bibo. Wa nika azadî bibo û wa rayberê ma serbest bêro veradayîş. Ma xêrcê aştî çîyêk bîn nêwazenê."
'Semedê aştî bibê yew'
Zubeyde Işik zî tewrê mîtîngî bî û hest û fehmê xo ard ziwan û wina va: "Ganî Rayber Abdullah Ocalan azad bibo. Ganî aştî bêro awankerdiş; êdî bes o. Ganî ne tirkî û ne zî kurdî tutanê xo vînî nêkerê. Ganî tepişteyê sîyasî bêrê veradayîş. Ma pêro wayê û bira yê. Bêrê ma semedê aştî bibê yew û biresê armancê xo."