Rozerîn Gultekin

 

STENBOL - Merdimê vînîbîyayeyan Îkbal Eren dîyar kerd ke înan dosyayêk ke ci de têkoşîn, waştiş û agahîyê înan yê vînîbîyayeyan ser o estê, pêşkêşê kombîyayîşê komîsyonî kerdê. Îkbal Eren va, "Hîn kesî matmayî mendî, sey reya yewine yo eşnawenê. Eke çîyêk nêkerê, ê do bibê beşêk nê tarî, nê semedî ra ganî wezîfeyê xo bikerê.”

 

Dayîkê Şemeyî semedê kombîyayîşê 20ê tebaxe ya Komîsyonê Pêgirewtişê Neteweyî, Wayê û Biratî û Demokrasî ke ya meclîs de ameyo awankerdiş, ameyî dawetkerdiş. Yek beşdarê kombîyayîşî, Îkbal Eren, waya Hayrettîn Ereno ke 45 serrî verê destbendkerdiş de vînî bibi, kombîyayîşê komîsyonî û waştişê xo qal kerd.

 

'Ma neql kerd ke ma se kenê û çi wazenê'

 

Îkbal Eren hêvîya xo ard ziwan ke awankerdişê komîsyonî do netîceyê pozîtîfî bido û muhîmîyê dawetê hetê Dayikê/Merdimê Şemeyî ra semedê komîsyonî ard ziwan. Îkbal Eren va, "Ma endamanê komîsyonî rê fikrê xo, waştişê xo reyna kerd la semedo ke sînorê wextî estbî, ma dosyayêk pêşkêşê komîsyonî kerd. Dosya de, zêdeyêrî 500 kesê vînîbîyaye û tarîxê înan, waştişê ma, cewherê têkoşînê ma û averşîyayîş û vînîkerdişê têkoşînê qanûnî yê semedê vînîbîyayeyan estbî. Goşdarîkerdişê hetê komîsyonî ra hem semedê înan û hem semedê ma muhîm o, semedo ke vînîkerdişî polîtîkayêk dewlete yê. Ma heq û edalet wazenê. Eke ma bi rastî wazenê welatêk demokratîk de biciwîyê, ez bawer kena ke na game zaf muhîm a. Semedo ke vejîyê werte ganî sûcdarî bêrê muhakemekerdiş û rî bi rî mendiş bibo. Bê nê mumkin nîyo ke raştî vejîyê werte.”

 

'Hîn matmayî mendêne, sey reya ewil şinawenê’

 

Îkbal Eren, dîyar kerd ke helwestê komîsyonî hemverê înan de pozîtîf bîyo û va: "Ê zaf eleqedar bî. Ez nêeşkena nê çî semedê pêrune vajî la hîn  endamê komîsyonî heta nêzdî ma bî û eleqe mojnayî ra. Dimayê ke roniştişê ma peynî bî, hem serekê komîsyonî Numan Kurtulmuş û hem zî çend endamê bînî yê komîsyonî nêzdî ma bî û xemgînîyê xo ardî ziwan. Înan va ganî her kes semedê çareserkerdişê nê problemî çîyêk bikero. Hîn matmayî mendî, seke reya ewil şinawenê. Yê bînî zaf bi baldarî goşdarî kerdî û not girewtî. Problemê kesê vînîbîyaye wijdanê nê welatî yo. Eke ê çîyêk nêkerê, ê do bibê beşêk nê tarîtî. Nê semedî ra ganî ê rolê xo kay bikerê.”

 

'Ganî cinî vernê de bê’

 

Îkbal Eren dewam de va, "Wexto ke ma ewnîyenê xoza ra cinî tut ana dinya û pîl kena. Nê semedî ra dayîke aya ke dej ancena ya. Ganî cinî vernê de bê. Xora ma komelêk serdest ê camêrdan ciwîyenê. Demê verê de hende însanî vînî bî ke ma resayî na sewîya, ma hende vînîbîyaye dî. Eke qalê înan biameyîne kerdiş do birayê mi vînî nêbîne. Dayîkan vengê xo berz kerd. Semedo ke ê dejê tutanê xo ancenê. Cayo ke cinî çin a, cinî qisey nêkena, do camêrdî polîtîkayan awan bikerê. Nîmeyê komelî cinî yê, nê semedî ra qiseykerdişê înan xozayêr çîyêk çin o.”

 

'Ma do efû nêkerê, tena bêrê rî bi rî’

 

Îkbal Eren, qalê qedexeyê meydanî kerd û va, "Hewteyê verê Wezîrê Karê Zereyî û Îdarekarê Îstîxbaratê Neteweyî uca bî. Eke ez endamê komîsyonî bibayîne, mi do bivatêne, 'Meydan abikerê ke rîyê ma bibo, ma Dayîkê Şemeyî dawetê tîya bikerê.' Ma 10 kesan dir bi astengî eşkerayîyêke danê. 10 kesî tena eşkenê bikewê meydan. No nîno qebûlkerdiş. Vernîya her çî, ganî no bêro çareserkerdiş. Ma nê waştişî komîsyon rê kerd. Çi beno wa bibo, çi vejêno werte wa vejîyo, ma do semedê vînîbîyayeyanê xo edalet bigeyrê. Ma do înan qet xo vîr ra nêkerê, ma do nê çî efû nêkerê. Wa no kombîyayîş sey nîşanêk efûkerdişî nêro famkerdiş. Ma do qet efû nêkerê. Tena ma do bêrê rî bi rî.”