QERS- Arzu Savaş Derman ke qirkerdişê Têkorî de xalê xo vînî kerd, wina: “Nêdabî linganê înan ro. Bi darbeyê kiştişî hedef girewtibî. Gumanbarî nêameyî muhakemekerdiş, dewa amî padayîş. La semedê ma hema zî birînêk bi gonî ya.”

 

Qirkerdişê Têkorî ser o 32 serrî derbaz bî. Dewijan semedê protestokerdişê ke zextê dewlete û ferzkerdişê qoricîtî rayîrşîyayîş kerdibî û amebî qetilkerdiş. 14ê tebaxa 1993ine de hêzê asayîşî gule şarî ser o rijnayî. Qirkerdiş de, Gulcan Çagdavul (8 ), Selvî Çagdavul (14), Yeter Kerencîler (13), Necla Geçener (14), Zarîfe Boylu (15), Erdal Bugan (17), Zeynep Çagdavul (19), Hacer Hacioglu (20), Suna Çidemal (21), Fatma Parlak (22), Faruk Aydin (27), Cemil Ozvariş (39), Giyasettîn Çalişçi (41), Hasan Çagdavul (43), Suleyman Taş (47), Nurettin Orun (80), Tutiye Talan (66) dinyaya xo bedelnayî û 63 kesî zî birîndar bî. La gumanbar bêceza ameyî verdayîş. 

 

Hemsereka Partîya Têduştî û Demorkasî (DEM Partî) ya Qersî Arzu Savaş Derman ke qirkerdiş de xalê xo vînî kerd, derheqê a roje de ajansê ma rê qisey kerd.

 

‘Dest dayîne xidayê merdimî ser’

 

Arzu Savaş Derman dîyar kerd ke 1993ine de herême ambargo û zextê cidî babeta vatişî bî û va: “Merdimî semedê xidayan şîne merkezê bajarî la rayîr de ameyîne vindarnayîş û xidayê înan ameyîne desteserkerdiş. Na rewşe her tim dewam kerdêne û şar na rewşe ra razî nêbi. Bêzar bibi. Vatêne çira no zulm yeno kerdiş. Çewalek kartol girewtêne tena di kîlo dayîne înan û yê bînan veng kerdêne. Şekir bi eynî hawa kerdêne. Xidayê merdiman ameyîne desteserkerdiş.”

 

‘Bêîqazkerdiş gule rijnayî’

 

Arzu Savaş Derman dîyar kerd ke xalê aye Faruk Aydin zî rayîrşîyayîş de bîyo û va: “Tuta xalê mi 6 aşmî bî. Rayîrşîyayîş nêzdîyê Têkorî bibî. La vengê çekan ameyîne. Merdimî mîyanê gonî de kewtî erd. Tîmên taybetî yê giran xo nimitibî û bêîqazkerdiş gule varnayî. Birîndarî hewl dayî ke biremê. Hînî rayîr ser o kewtî. Her ca gonî bî. Merdimî bi endîşe û hewar bî. Merdiman hewl dayîne ke birîndaran xelas bikerê û xo biresnê wesayîtan. La ê zî ameyî gulevarankerdiş.”

 

‘Mîyanê kesê ke ameyî qetilkerdiş de tutî zî estbî’

 

Arzu Savaş Derman dîyar kerd ke zilm xora giran bi û va: “Mîyan de xalê mi û nasê ma zî estbî. Destê tu kesî de çeke çinbî. Tena semedê waştişê xo bîyarê ziwan şîne. Cinî, ciwanî û kal û pîrî hedef ameyî girewtiş. Tutî zî ameyî qetilkerdiş. 14-15 serre bî. Nêweşxaneyan de zextî dewam kerdî. Hedîse demêk kilm de vila bî. O wext ma dewe de bî. Wexto ke m agahî girewt ma şî Têkor. Girewtişê cenazeyan bêîmkan bî. Cenaze eynî roje nêdayî. Di rojan Têkor de dayî vindartiş. Her dewe de gor ameyîne kolnayîş.”

 

Gumanbar nêameyî muhakemekerdiş

 

Arzu Savaş Derman dîyar kerd ke a tu wext na hedîse xo vîr ra nêkena û wina va: “Xeylêk kesî semedê vînîkerdişê gonî dinyaya xo bedelnayî. Vanê 17 kesî la hûmare goreyê mi zêde bî. Dimayê qirkerdişî dewa amî akerdiş. La dosya dima ra amî padayîş. Gumanbarî nêameyî muhakemekerdiş.”