Memîhan Zeydan

 

WAN - Dayîkê Aştîye kombîyayîşê şarî yê Elbakî de qisey kerdî û vatî, "Ganî êdî tu dayîkî mebermê, bêrê ma dora aştîye de bibê yew."

 

Proseso ke vengdayîşê Rayberê Şarê Kurdî Abdullah Ocalanî yê semedê "Aştî û Komelê Demokratîkî" 27ê Sibate de dest pêkerd, bi averşîyayîşê neweyî dewam kenê. Averşîyayîşo tewr muhîm ke prosesê aştî aver berd, parekerdişê vîdyoyêk Abdullah Ocalanî bî ke reya ewilî 9ê temmuze de Zindanê Girawa Îmraliyî ke bî 26 serrî yo yeno tepiştiş, ame kerdiş. Di rojî dimayê parekerdişê vîdyoyî, gerîlayê Koma Aştî û Komelê Demokratîkî yê 30 kesan pê ameyîne, bi serekîya Hemsereka Konseya Îdareya KCK'yî Besê Hozat, herêma Şikefta Casenî ya Silêmanîye, merasîmê çeke veşnayîşî organîze kerd.  Esasê ke merasîmê veşnayîşê çekan derbaz bîyo de, hewldayîşê semedê awankerdişê aştî û cimeatêk demokratîkî dewam kerdê.

 

50 kombîyayîşî ameyî organîzekerdiş

 

Dimayê nê averşîyayîşî, Partîya Têduştî û Demokrasî (DEM Partî) çarçewaya "Kombîyayîşê Komelê Demokratîkî" de kombîyayîşê pêroyî organîze keno. Nê kombîyayîşê pêroyî bajar û taxe seranserê Tirkîya û Kurdistanî de dewam kenê. 100 kombîyayîşê pêroyî yê ke bi serkêşîya DEM Partî Wanî de amebî plankerdiş, 50 ci ra ameyî organîzekerdiş. Yew 50 kombîyayîşê qezaya Elbak  ya Wanî de ame organîzekerdiş.

 

Dayîkê Aştîye yê ke beşdarê kombîyayîşê pêroyî bîy prosesî erjnayî.

 

'Wa yewîye bibo'

 

Dayîka Aştî Hanîfe Bilmez wina va, "Ez wazena ke aştî zêdeyêr demî de pê bêro. Ganî dewlete zî tedbîran bigîro. Ma wazenê tepişteyî zîndan de bêrê veradayîş û yê sirgûnî agêrê. Wa yewîye bibo, merg û tepiştiş nêbo."

 

'Bêrê ma dorê aştîye de bibê yew'

 

Dayîka Aştîye Sînem Yildiz, bale ant serê muhîmîyê demokrasî û aştîye û va, "Wa gerîla agêrê, wa êdî gonî nêrijîyo. Wa têkiliyê wayê û biratî mabêne her di neteweyan de bêrê awankerdiş. Wa berê zindanî bêrê akerdiş. Wa dayîkî êdî mebermê, wa her kes destê xo bido wijdanê xo ser û dorê aştîye de bibo yew."

 

'Ma azadîya rayberê xo wazenê'

 

Dayîka Aştîye Feleknaz Yildiz qetî kerd ke aye azadîya fîzîkî ya Rayberê Şarê Kurdî Abdullah Ocalanî û yewîye wazeno. Feleknaz Yildiz va, "Wa zîndanî abibê. Wa ne dayîkê kurdî û ne zî dayîkê leşkeran nêgîrê. Bêrê ma sey şarê kurdî û tirkî destê xo bidê yewbînan. Ma êdî gonîrijnayîş nêwazenê. Demo ke mi dî ke çekî yenê veşnayîş, ez keyfweş bîya ke êdî gonîrijnayîş nêvirazîno. Ma aştîye wazenê. Ma azadîya rayberê xo wazenê."