NAVENDA NÛÇEYAN - 33’yemîn Festîvala Çanda Kurd a Navneteweyî ku li Ewropayê merasîma şahiya herî mezin a Kurdan e, îsal bi dirûşma “Rêbertiya Azad û Civaka Demokratîk” li bajarê Dortmund ê Elmanyayê tê pîrozkirin.

 

Bi dirûşma “Rêbertiya Azad û Civaka Demokratîk” li bajarê Dortmund ê Elmanyayê 33’yemîn Festîvala Çanda Kurd a Navneteweyî dest pê kir. Kurdistanî û dostên wan ji bajarên cuda yên Ewropayê û Elmanyayê di saetên siharê de berê xwe dan qadê. Kurdistanî û dostên wan li qadê govend gerandin û li benda destpêkirina festîvalê rawestiyan.

 

“Meşa Azadî û Demokrasiyê” ku her sal weke kevneşopî tê lidarxistin, îsal jî eleqeyek mezin dît. Meşa ku 9’ê Îlonê li Kolnê dest pê kir û qasî 5 rojan li guzergahên cuda dewam kir, li qada festîvalê bi dawî bû.

 

Meşvanên Azadiyê bi berzkirina dirûşmeyên “Bijî Serok Apo”, “Bê Serok jiyan nabe” û “Jin Jiyan Azadî”, bi posterên Rêberê Gelê Kurd Abdullah Ocalan û flamayan ketin qadê. Meşvan li qadê bi coş hatin pêşwazîkirin. Bi hev re sirûda “Çerxa Şoreşê” xwendin û girse silav kirin. Bi hatina meşvanên azadiyê re, her kes bi gerandina govendê û bi coşeke mezin li benda destpêkirina festîvalê ne.