Reaksîyon hemverê qeyûman: Ma sere nêtewênenê

2025-01-15 10:30:42


	 

	Pelşîn Çetînkaya

	 

	MÊRSÎN - Dayîkê Aştîye yê ke badê qeyûm tayînê Şaredarîya Akdenîzî ame kerdiş, beşdarê çalakîya xoverdayîşî bîyî, dîyar kerdî ke ê aştî wazenê û vatî: "Ma heta dilopê peyîn gonîya xo de tîya yê. Ma sereyê xo nêtewênenê û çok nêdanê ro.”

	 

	Hemverê tepiştişê Hemşaredarê Akdenîzî yê Mêrsînî Nûriye Arslan û Hoşyar Sariyildiz û endamê Meclîsê Şaredarîye Ozgur Çaglar, Neslîhan Oruç û Hikmet Bakirhan yê ke binê îdareyê Partîya Têduştî û Demokrasî (DEM) de ameyî tepiştiş û tayînkerdişê qeyûman xoverdayîşê şarî dewam keno. Çalakîya nobete ke bi girseyêk pîl pê yeno, xoverdayîş her roje reseno qonaxê cîya. 

	 

	Dayîkê Aştîye yê ke nobete gênê, ajansê ma JINNEWSî rê qisey kerdî. 

	 

	'Ma çete nîyê'

	 

	Dayîka Aştîye Tenzîle Baydar dîyar kerd ke ê hemverê zilm û qeyûman de vejîyayê meydanan û vat: “Ma mal û milkê kesî nêdizina. Ma bi zorî şaredarî kesî ra nêgirewt. Sey kurdî ma tirk û ereban dir şaredarî bi dest kerd. Ma ne dizd û ne zî çete yê. Ewro şaredarîya ma bi darê zorî girewtî, heqê kurdan, bi taybetî zî yê dayîkan destê înan ra gênê. Heqê kesî çin o nê çî bikero. Vizêrî zî polîsan îşkence dayîkan rê kerdibî. 2 dayîkê ma wedarnayî nêweşxane. Dinya ra biewnê, nimûneyêk winasî çin o. Hemverê kurdan de qeyûm tayîn kerdî. Ma şaredarîya xo wazenê. Biewnê, polîsan dorê ma de dêsêk goştî ra viraşto. Şima se bikerê zî ma sey dayîkî vengê aştîye berz bikerê."  

	 

	'Ma do çokan ser o nêşêrê'

	 

	Dayîka Aştîye Emîne Seyhan zî wina fikrê xo ard ziwan: “Ma do heqê xo yê kurdan bipawê. Ma do heta peynî tîya bê, ma do heqê xo bipawê. Her çî semedê şarê ma yo. Hemverê zulmî de ma tîya yê, ma do ser bikewê. Ma do sere nêtewênê, çok nêdê ro û ma do zêdeyêr bixebitîyê.”

	 

	Muhîmîyê xoverdayîşî ser

	 

	Hanîfe Ûmît dîyar kerd ke şar binê zilmî de yo û wina vat: “Ma bi keda xo şaredarî girewt. Çîyo ke ma heq kenê, ma do înan ra peyser bigîrê. Zulm înan rê yeno kerdiş, dizd ê. Bêedaletî yeno kerdiş. Ma heta dilopê gonîya xo ya peyîn tîya yê. Ez o tîya dewam bikerî.”