Berçem Cûdî

 

KOBANÊ - Derheqê 9ine serrêgara xilaskerdişê Kobanê de, Hetgira Desteyê Kar û Barê Komelî ya kantonê Firatî Wehîde Omere bala ant serê têkoşînê cinîyan ê semedê xilasnayîşê Kobanê û vat: “ Kobanê bi têkoşînê cinîyan ame xilasnayîş. Bi gonîya cinîyanê sey Sozdar, Avesta, Arîn Kobanê ame xilasnayîş. Bi nê xilasnayîşî şarê Kobanê bi kêfweşî agêra serê herra xo. Rêxistinbîyayîşê cinîyan roj bi roje xurt bî. Kobanê newe ra şên bî.” 

 

Çeteyê DAIŞî Adara serra 2014î de hêrişê Kobanê kerd. Heta aşma temmuze ya eynî serre hêriş bi hawayê rojane dewam kerd. Çeteye DAIŞî 2yê Temmuza 2014î de zî hêrişê hîra yê seba îşxalkerdişê Kobanê da destpêkerdiş. Goreyê xeylê çimeyan paştîdayîşê dewleta tirkan yê bi DAIŞî reyde zî ame belgekerdiş. Kişta nê de çeteyê DAIŞî xo resnayî heta verê bere sînorê Kobanê. Serekkomarê Tirkiya Tayîp Erdogan a roje vat, Kobanê ha kewt, ha do bikewo. 5ê Teşrîna Verêne de ra heta 8ê Teşrîna Verêne ya 2014î bi milyonan kurdî û dostê kurdan vera hêrişan de herikîyayî raşteyan û xoverdayîşêke gird pê ame. Dimayê serewedarnayîş û xoverdayîşê gird yo ke bi serkêşîya cinîyan ê 134 rojan, 26ê Çeleyê 2015î de Kobanê ame xilaskerdiş. Reyna 25ê Hezîrana 2015î de çeteyê DAIŞî vera Kobanê de hêrişêke bîn pê ard. A roje zafaneyê înan cinî û tutî bî, 271 kesan dinyaya xo bedelnayî. La cewabê nê hêrişan ame dayîş û o wext nizdîyê 100 çeteyî ameyî kiştiş.

 

Bi wesîleya serrgêra xilaskerdişê Kobanê Hetgira Desteyê Kar û Barê Komelî ya kantonê Firatî Wehîde Omere qisey kerd û dîyar kerd ke bi serkêşîya cinîyan bi cesaret Kobanê ame xelisnayîş û wina vat: “Şehadetê cinîyê sey Zehra, Leyla, Arîn tesîrêk gird viraştî. Ê serkêşê ma yê. Remza têkoşînî yê. Ganî nêrî vîrîkerdiş. Bi keda nê têkoşeran ma ameyî heta roja ewro. Cinî û camêrdê kurdî zî nê esasan ser de xo perwerde kenê. No qet nîno vîrîkerdiş. Ê seba şarê kurdî mîrasêk ê.”

 

‘Ma sey cinîyan nê têkoşînî de cayê xo girewt’ 

 

Wehîdeye da zanayîş ke Kobanê de bi serkêşîya cinîyanê xoverdayîşêk gird pê ame û vat: “Ma xilaskerdişê Kobanê sere de şarê Kurdistanî rê pîroz kenê. Ma na serrgêre têkoşerê xilaskerdişê Kobanê ke canê xo feda kerdî, pîroz kenê. Ma eynî wext de Rayber Apoyî pîroz kenê. Kobanê de xoverdayîşêk gird vera çeteyê DAÎŞî de dest pêkerd. Ma şerê Sûrîye de ne xeta BAASî ne zî xeta hêrişan pawit. Ma xeta hirîne weçina. Ma vera hêrişan de serkewtişêk bi dest fîna û ma sazî û dezgehê xo awan kerd. Ma rêxistinbîyayîşê xo awan kerd û xurt kerd. Ma sey cinîyan nê têkoşînî de cayê xo girewt.” 

 

‘Vera hêrişan de qerarê xoverdayîşî ame dayîş’

 

Wehîdeye da zanyîş ke bi hemkarîya dewlete hêrişê Kobanê ame kerdiş û dewam kerd: “Herême de kurdan awankerdişêk hîra aver berd. La çimê dinya zî serê ma de bî. Dewletê mîyanneteweyî seba menfîetê xo waştî ke çîyê ke ameyî destfînayîş bixerepnê. Bi hemkarîya dewleta tirkan hêriş kerdî. Dewleta tirkan xora vana kurdêk dinya de bibo zî û azad bibo ez qebul nêkena. La kurdan zî xo serê esasê azadîye de newe ra awan kerd. Vera nê awankerdişî de zî kesê hêriş kerdî Afganistan, Pakistan û xeylê cayanê bînan ra kom kerdî û verê çimanê dinya de hêrişê ma kurdan kerdî. Nê kesî ameyî perwerdekerdiş û hêrişê Kobanê kerdî.”

 

Şarê Kobanê vera tanq û topan de vindert 

 

Wehîdeye dîyar kerd ke şarê Kobanê agêra û reyna wayîrê herra xo vejîya û wina vat: “Tanq û topê DAÎŞî estbî. La şarê Kobanê vat ma vera hêrişan de teslîm nêbenê, heta ke ma bieşkê ma Kobanê nêverdenê. Şarê Kobanê şarê Kurdistanî pêro bî. Şarê kurd ê Bakurî, Başûrî ma tena nêverdayî. Kobanê de şehîd kewtî. 26ê Çeleyê 2015î de ma eşkenê vajê ke Kobanê ame xelisnayîş. Yewna reye şarê Kobanê soz da ke agêro serê herra xo.”

 

‘Kobanê bi têkoşînê cinîyan ame xilasnayîş’ 

 

Wehîdeye bale ant serê têkoşînê cinîyan û wina vat: “Kobanê bi têkoşînê cinîyan ame xilasnayîş. Bi gonîya cinîyanê sey Sozdar, Avesta, Arîn Kobanê ame xilasnayîşq. Reyna sazî û dezgehê ma ameyî awankerdiş û şarê Kobanê ke agêra serê herra xo sazî û dezgehan de ca girewt. Bi nê xilasnayîşî şarê Kobanê bi kêfweşî agêra serê herra xo. Rêxistinbîyayîşê cinîyan roj bi roje xurt bî. Kobanê newera şên bî.” 

 

Rolê cinîyan rizgarkerdişê Kobanê de 

 

Wehîdeye ard ziwan ke rolê cinîyan xilasnayîşê Kobanê de xeylê muhîm o û wina vat: “Rolê cinîyan xilasnayîşê Kobanê de xeylê muhîm bî. Mîyanê awankerdişê Kobanê de zî cayêk muhîm ê cinîyan estbî. Cinîyan eynî wextî de YPJyî awan kerd. Cinîyê mîyanê komelî de zî kişta şervananê xo de bî. Her çend ke înan çek berz nêkerê zî ê kişta înan de bî. Bi nanê înan, kincê înan, bi şamê înan reyde bî. Cinîyê Kobanê pîya vatî ma fek Kobanê ra nêverdenê. Xilasnayîşê Kobanê vengdayîşê cinîyanê Kobanê bî. Cinîyê Kobanê wina tesîrêk gird serê dinya de kerd. Şehadetê cinîyê sey Zehra, Leyla, Arîn tesîrêk gird viraşt. Ê serkêşê ma yê. Remza têkoşînî yê. Ganî nêrê vîrîkerdiş. Bi keda înan têkoşeran ma heta roja ewro ameyî. Cinî û camêrdê kurdî pîya serê nê esasî de xo perwerde kenê. Ê seba şarê kurd mîras ê.”

 

Tesîrê xilasnayîşê Kobanê 

 

Wehîdeye bale ant serê tesîrê xilasnayîşê Kobanê û vat: “Komel zî kişta şer de bî û dimayê xilasnayîşê Kobanê xo perwerde kerd. Xilasnayîşê Kobanê hetê pozîtîf de tesîrêk gird serê komelî de kerd. Şorişê Kobanê bi nameyê şorişê cinî ame pêhesnayîş. Cinîyan bi perwerdekerdişî reyde hîna zêde xo rêxistin kerd. Heto bîn de sîstemê hemserekatîye ame awankerdiş. Her sazî û dezgeh de sîstemê hemserekatîye ame rayîr ra berdiş. Ganî her qeraro ke bêro dayîş de reng û vengê cinîye zî bibo. Ganî bi çimanê cinîyan qerar bêrê dayîş. Ganî her sazî û dezgeh de edaletê cinîyan bibo. Ma her tim vanê wexto ke cinî azad biba komel zî azad beno.” 

 

Tesîrê cinîyê kurd ê serê cinîyê dinya 

 

Wehîdeye qiseykerdişê xo yê peyênan de da zanayîş ke xeylê welatanê cîyayan ra cinî ameyî Kobanê û vatî ke do kişta cinîyanê kurdan de şer bikerê û wina peynî kerd: “Cinîyê kurdî feyzê xo, esasê cuya xo felsefeya Rayber Apoyî ra gênê. Yê ke vat mi projeyê cinîyan da destpêkerdiş la mi nîmcet verda, mi temam nêkerd, hêvîya mi no yo ke şima temam bikerê, Rayber Apo bî. Cinîyê kurdî na nuqtaye de dest pêkerdî. Xonaskerdiş û azadîye ra dest pêkerdî. Cinîyan vat ke ma Kobanê ra nêvejîyenê û xo bi rêxistin kerdî. Cinîyan Kobanê de vatî ma wayîrê herra xo vejîyenê û ma fek nê erdî ra nêverdenê. No serê cinîyanê dinya de tesîrêk gird viraşt. Mîyanê şorişê de cinîya kurde xo azad kerd. Ma mîyanê şorişî de xo nas kerd û rêxistinbîyayîşê xo zî xurt kerd. Cinîyê dinya hemverê ma de şaş mendî. Xeylê welatanê bînan ra cinî ameyî tîya û tewrê şorişî bîyî. Seba azadîya xo, seba azadîya şaran û seba azadîya Kobanê vatêne ma do kişta şima de şer bikerê. “