AMED - Nuştoxa kurde Fatêxan Taşli Tunça ke fuarê kitaban de kitabe xo yê bi nameyê ‘Kezî’ da naskerdiş, dîyar kerd ke hîri kitabê aye yê bîn ê ke amade kerdî est ê û vat: “Ez venga cinîyan kena ke binusê. Cuya her cinîyêke bi hîkayeyê balkêşin babeta edebîyat û şîîrî ya.”

 

Roja ma ya ewro de weşanê kurdî polîtîkayê şerê taybet ê çinîkerdişî de vera heme tedayan reseno komelî. Tedaya serê ziwanê kurdî dewam keno. Nuştoxe Fatê Xan Taşli Tunça ke vera heme tedayan de nuştişê xo dewam kena, dîyar kerd ke amancê aye yê tewr gird no yo ke bi nasnameyê cinîya kurde eseran beverda. Fatêxane kitabê xo yê ewil ‘Kezî’ Amed de fuarê kitaban de yê aşma Kanûne de da naskerdiş. Fatêxane dîyar kerd ke hîrê kitabê aye yê bîn ke amade kerdê est ê. 

 

‘Edebîyatê ma semedo ke zafane fekî bî heta ewro ame’ 

 

Fatêxane da zanayîş ke dewamkerdişê edebîyatê kurdî bi wesîleya dengbêj û cinîyê ke deyîre vatêne pê ameyo û vat: “Şarêke bîn herinda kurdan de bibayêne, vera înan tedayan de do rew ra çinî bibayêne. Kurdan edebîyatê xo bi dengbêjî, şîîr û hîkayeyan dewam kerdî. Edebîyatê ma semedo ke fekî bî heta ewro ameyo. Ma vanê tedaya serê ziwanê kurdî kêm bîyo lê kêm nêbîyo. Eke edebîyatê kurdî ewro hema serê payan de bo se bi wesîleya cinî, edebîyatkar û şarê kurdî yo.”

 

‘Problemê ekonomîye vera nênusenê’ 

 

Fatêxane dewamê qiseykerdişê xo de ard ziwan ke merdim dima ke dinyaya xo bedelneno zî ganî pey xo de eseranê ke qala înan yenê kerdiş biverdo û wina vat: “Bi taybetî ganî cinî binusnê. No xeylê muhîm o. Cegerxwîn seba nuşteyê cinîyan şîîrêke vano. Vano merdim bimiro zî ganî merdim sereberz û bi ercaye bimiro. Mergê merdiman zî muhîm o. Wexto ke merdim bimiro ganî merdim çîyêk xo pey de biverdo. Ganî merdim nameyêk xo pey de biverdo.”

 

‘Cuya mi de çîyê zaf baş nêameyî ciwîyayîş’ 

 

Fatêxane bale ant serê kitabe xo yê bi nameye ‘Kezî’ û vat ke kitabe xo şirawita zîndanan zî û wina dewam kerd: “Kitabê mi hetê tepişteyan ra zî ame tesdîqkerdiş û fikrê pozîtîf vejîyayî raşte. Kitabe mi yê ‘Jiyana dayikan’ de cuya dadîyan yena destgirewtiş. Nika hîrê xebatê mi est ê. Yew ‘Jiyana dayikan’ o. Mi qala xo zî kerd. Cuya mi de zî çîyê zaf weş nêameyî ciwîyayîş. Kitabêk mi yê şîîrî zî est o. Nika hîrê dosyayê mi yê bîn zî est ê. La mesref zaf zêde yo. Ekonomî mi dana zehmetî. Coka ra mi da vindarnayîş.” 

 

‘Ti bi ziwanê kesê bîn biciwîya ti çin a’ 

 

Fatêxane kitabe xo fuarê kitaban ê Amedî de da naskerdiş û vat ke bi taybetî wendekaran eleqeyêk gird nişan dayî. Fatêxane wina qiseykerdişê xo peynî kerd: “Cuya her cinî û dadîyêke babeta edebiyat û şîîrî ya. Cuya înan sey şîîrî ya. Ma nêwazenê şîîranê bi dejin binusnê. Ma cuya kurdan de asayîş wazenê. Ma wazenê şîîrê eşqî bibê. Edebîyatê kurdî xeylê aver kewto. Tabî bedelê gird ameyî dayîş. Wa cinî xo bizanê û ziwanê xo bizanê.”