Rozerîn Gultekîn

 

AMED - Endama Yewîya Hekîmê Mîyanneteweyî ya Seba Vernîgirewtişê Şerê Nukleerî Gîsela Pentelera ke wayîrê kampanyaya ‘Abdullah Ocalanî rê azadî problemê kurdî rê çareserîya sîyasî’ vejîyena, bale ant serê bêvengîya raşteyê mîyanneteweyî û vat: “Çareserîya problemê kurdî bi azadîya Birêz Ocalanî mumkun a.” 

 

Semedê Rayberê PKKyî Abdullah Ocalanî ke 25 serrî yo Îmraliyî de binê tecrîdî de yo û 33 aşmî yo ci ra tu xeberêke nîna girewtiş 10ê teşrîna verêne de her çar hetê dinya de bi hawayêkê hemdem hemleya ‘Abdullah Ocalanî rê azadî problemê kurdî rê çareserîya sîyasî’ dîya destpêkerdiş. Hemleyê 74 welatan de dîya destpêkerdiş û di aşmî yo ke dewam keno. Her cayê dinya ra paştîdayîş semedê hemleyî yeno dayîş. 

 

Endama Yewîya Hekîmê Mîyanneteweyî ya Seba Vernîgirewtişê Şerê Nukleerî Gîsela Pentelera ke paştîdayîş dana kampanyaya ‘Abdullah Ocalanî rê azadî problemê kurdî rê çareserîya sîyasî’ derheqê kampanyaye de ajansê ma rê qisey kerd. 

 

Tecrîd îşkence yo 

 

Gîselaye da zanayîş ke tecrîdê giran ê serê Rayberê PKKyî Abdullah Ocalanî îşkence yo û bi tecrîdo ke pê yeno zî huqûqê mîyanneteweyî yeno binpaykerdiş. Gîselaye wina dewam kerd: “Pawitoxê Heqanê Merdiman tecrîdî sey îşkence qebûl kenê. Tirkîya hetê Pêkerdişê Vera Îşkenceyî de ya. La xeylê babetan de hukmê nê pêkerdişî binpay kena. CPT şî zîyaretê Tirkîya û Îmraliyî. La destur nêda ke rapor bêro wendiş. Nê pêkerdişî vera netîce nêda.”

 

‘Abdullah Ocalan ganî azad bibo’ 

 

Gîselaye dewamê qiseykerişê xo de dîyar kerd ke welat semedê menfîetê xo vera binpaykerdişê heqan û tecrîdo ke Tirkîya de serê Abdullah Ocalanî de pê ano, bêveng maneno û şar vera hemkarîya îqtîdaran de dormeyê Abdullah Ocalanî de yeno têkîşt. Gîselaye nê çîyan vat: “Hukmatê Almanyaye, dewletê Ewropa û rojawanî menfîetan vera girêdayeyê Tirkîya yê. Vera binpaykerdişê heqan yê Tirkîya de bêveng ê. Şarê kurdî Abdullah Ocalan sey rayber vîneno û paradîgmaya ci taqîp keno. Coka ra zî ganî Abdullah Ocalan azad bibo û tewrê prosesê aştîye bibo.” 

 

‘Bê Birêz Ocalanî çareserî mumkun nîyo’ 

 

Gîselaye qiseykerdişê xo yê peyênan de bale ant serê muhîmîya kampanyaye û vat, coka ra kampanyaye de ca girewta û wina peynî kerd: “Ma tewrê kampanyaye bîyî. Çije problemê kurdî bi azadîya Birêz Ocalan û tewrbîyayîşê ci eşkeno bêro çareserkerdiş. Ma na bawerîye de yê la çi heyfo ke kampanya bi tena sereyê xo mird nêkena. Kampanya zaf muhîm a û coka ra ma tewrê ci bîyî. La hema nêresaya çapemenîya hetgir û merdiman. Nimûne Almanyaye de wina ya. Xeberê derheqê rewşa Birêz Ocalanî de û kampanyaye de tena dormeyê aktîvîstê eleqedarî de manenê. Coka ra ganî na babete bi lezkî bêra destgirewtiş. Ganî ma na babete de teda bikerê. Ez venga her kesî kena ke bibp hemkar û nê çîyî bidê eşnawitiş.”