Rozerîn Gultekîn

 

ŞIRNEX - Aygul Bînîcîye pê berardişê ke keyeyê xo de virazena Bazarê Cinîyan ê Şaredarîya Silopî de ca akerda û dîyar kena ke her çend raşteyê kar bibo aye kêfweş bena û krîzê ekonomîye tesîrêk gird înan ser de kerdo.

 

Yew şaredarîyê Partîya Demokratîke ya Şaran (HDP) ke qeyûm tayînê ci nêameyo kerdiş Şaredarîya Silopî ya Şirnexî ya. Şaredarî serra 2022yî de seba cinîyan Bazarê Keda Cinîye akerd. Bazar de 12 dikan, kafeyêk û odeyêka şitdayîşî est o. Nê bazarî de yeno amanckerdiş ke cinî tewrê berardişî biba û tewrê cuye biba. Yew cinîyê ke dikan akerda zî Aygul Bînîcî ya. 

 

Berardişê bi serran ke keye de viraştêne açarna kar 

 

Aygule dîyar kerd ke tutîya aye de keyeyê aye bi çinitişî îdareyê xo kerdêne û wina vat: “Serrêke û nîme yo ez dikanê xo de berardişanê xo roşena. Mi eşnawit ke bazar abeno, mi cade muracatê şaredarîye kerd. Nê prosesî de hetkarîya mi kerdî. Sere de şikê mi est bî. La dima ra mi tersanê xo şikit. Wayê mi paştîdayîş dayî mi. Yew waya mi muhendîsê gidayî ya. Aye hetkarîya mi kerd. Waya mi ya bîn zî keyeyê xo mi rê akerd, ez berardişanê xo keyeyê aye de virazena. Mi waşt ke ez çîyêk bikera û ê zî paştîdayîş dayî mi."

 

‘Ma bîyî wayê yewbînan, embazê yewbînan’ 

 

Aygule dewamê qiseykerdişê xo de da zanayîş ke seba ke Bazarê Keda Cinîye de tewrê karî bîya zaf kêfweş a û wina vat: “Ma dikan akerd. Ez şit, mast, penîr û sewbîna çîyan ê sey jajî, tirşî, dims, salçe, fêkî û sebzeyanê wuşkan virazena. Xeylê berardişê bîn ê ke ma nêeşkenê virazî zî ez dewan ra herînena. Verê cû mi nê heme çîyan dewe de viraştêne. Şaredarî hîrê aşmî yo ke ca daya mi. Ez berardişanê xo nika uca de virazena. No seba cinîyan xeylê baş bî. Vernîya ma akerd. Heme esnafê uca cinî yê. Mi kêfweş kenê. Ma heme yewbîyanan reyde bîyî embaz û way.”

 

‘Verê cû bi bîdonan girewtêne nika bi graman gênê’ 

 

Aygule qisyekerdişê xo de bale ant serê krîzê ekonomî û vat ke krîz tesîrêk gird înan ser de kerdo û wina vat: “Vayeya berardişan ra ma xeylê zehmetîyan ancenê. Destê mi de zêde pere nêmendo. Ma timî seba dikan xerc kenê. Faturayê cereyanê dikanî 2 hezar yeno. Qezencê ma nêbeno. Kîloyêk penîr bi 150 TLyî yeno rotiş. Keyeyê tîya qelebalix ê. Verê cû bi bîdonan ameyêne girewtiş. Nika zî bi graman gênê. A roje ma 200 gram penîr rot.”

 

Aygule qiseykerdişê xo yê peyênan de vat ke vera her çîyî ganî cinî payanê xo ser de vinderê û vat ke eke vernîya cinîyan bêra akerdiş do bieşkê her çîyî bikerê û kesê ke bieşkê komelî xurt bikerê zî cinî yê.