AMED - Rayberê PKKyî Abdullah Ocalan binê tecrîdê giran de yo û 29 aşmî yo tu agahî ci ra nîna girewtiş. Cinîyê Farqînîjî derheqê tecrîdî de qisey kerdî, dîyar kerdî ke tecrîd her hetî rê vila bîyo û hemverê tecrîdî de venga yewîye kerdî. 

 

Bi 29 serrî yo serê Rayberê PKKyî Abdullah Ocalanî de tecrîdêk giran yeno rayraberdiş. Tecrîdo ke roj bi roje kûr beno, eynî wextî de serê şarê kurdî de zî tesîrêk pîl keno. Polîtîkaya tecrîdî tenê Îmraliyî de nê, her hetê Kurdistanî de yena rayraberdiş. Dewleta tirke bi polîtîkayê tecridî serê xoza, kultur û ramyarîyê kurdan hêriş kena û wazena şarî mîyanê nê polîtîkayan de bifetisîno. Labelê şarê kurdî hemverê tecrîdî bi vindertişêk bi qerar vindeno û têkoşîn keno. Derheqê babete de Meryem Akin wina vat: "Lazim o ke ma hemverê dewleta xo nêdê pelçiqnayîş.”

 

‘Veng bidê zindanan’

 

Meryem Akine vernê de bale ant serê tecrîtê ke 29 aşmî yo serê Rayberê PKKyî Abdullah Ocalanî de yeno rayraberdiş û dîyar kerd ke heta Abdullah Ocalan azad nêbo, cinîyê kurdî zî azad nêbenê û qiseykerdişê xo wina dewam kerd: “Keyeyê Rayberê Apo tu agahî ci ra nêgîno, avûkatê ci zî tu agahî nêeşkenê ci ra bigîrê. Lazim o ke ma bêveng nêmanê û nê tecrîdî qebûl nêkerê. Ganî her kes seba tepişteyan zî veng vejo. Veng bidê zindanan.”

 

Tecrîd bi her hawayî yeno kûrkerdiş

 

Meryeme da zanayîş ke tecrît her hetî ra xo serê  Kurdistanî de awan keno. Meryeme bale ant serê polîtkîkayê tecrîdî yê kulturî, xozayî û fehmî û wina dewam kerd: "Hetêk ra keyeyê tepişteyê sîyasî zî xeylêk zehmetî ancenê, zilm înan rê yeno kerdiş. Hetêk ra zî Licê, Dêrsim, Cûdî de dar û daristanî yenê veşnayîş. Nêwazenê welatê Kurdistan bibo. Yenê welatê me, bi konseran wazenê şarê ma asîmîle bikerê. No zî tecrîdek o, senîn zîndanan de zulm yeno kerdiş, serê Abdullah Ocalanî de tecrît yeno rayraberdiş, bi eynî hawa serê şarê kurdî de zî xo bîyaye keno. Nêwazenê kurdî bibê.”

 

Cinîyê ke Şorişê Rojawanî pê ardê, bîyê serkêş

 

Meryeme tewr peyîn qalê Şorişê Rojawanî kerd û dîyar kerd ke cinî bîyê serkêşê şorişî û qiseykerdişê xo wina qedêna: "Cinî senîn Rojawan de wayîrê heqê xo vejîyenê û serê lingan de yê, ganî ma zî wina bibê. Ê senî wayîrê Şorişê Rojawanî vejîyenê, ma zî Kurdistanê xo rê wayîr vejîyê. Lazim o ke ma hemverê dewlete xo nêdê pelçiqnayîş.”

 

Rayîrê çareserî yewîye de derbaz beno

 

Melîha Başkale zî dîyar kerd ke yewîye mîyanê şarê kurd de çin a û vat: "Mîyanê ma de hîn kesî estê, ajan û mît ê. Wina nêbîne do senî bi teyareyê xo û bombayanê xo bieştêne serê tutanê ma? Coka ganî şarê kurdî bibo yew, hemverê kesê hêrişê ma kenê xo ver bidê. Abdullah Ocalan zî nêvejenê, wazenê zîndan de bipûwnê. Selahattîn Demirtaşê zî nêvejenê. Labelê ma nêverdê ê sere bi ma bêdê tewênayîş û ma do xo ver bidê."

 

Tecrîd her ca de vila bîyo

 

Melîha dîyar kerd ke şarê kurdî wurzeno serê lingan  û xo ver dano labelê sebebê ajan û mîtan destkewtişê şarê kurdî yenê çinkerdiş. Melîha wina dewam kerd: "Dewlete vana ez înan vêşan bikişî. Ma deyndar kena. Malê ma pere nêkeno. No zî tecrîdek o. La çîyo muhîm oyo ke ma hemverê pêro polîtîkayan xo ver bidê.”

 

‘Ganî şarê kurdî mil bido yewbînan’

 

Melîha bale ant serê rewşa zîndanan û tecrîdê serê Rayberê PKKyî Abdullah Ocalanî û vat:  "Serê tepişteyanê ma de teda û zulm kenê. Tepişteyê ma yê nêweşî estê û nînê tedawîkerdiş. Ganî şarê kurdî dest bidê yewbînan. Heta ke ma nêbê yew û mil nêdê yewbînan ma do na rewşe de bibê.”