AMED - Tutê ke germbîyayîşê bajarî yê 40 dereceyî derbaz keno ra bêzar benê, xo mîyanê awa  Anzeleyî ya Sûrî de vînenê.  

 

Awa Anzeleya ke awa muhîm a Sûrê Amedî ya, qilê Qerejdaxî ra yena û binê Berê Diçimî yê Taxa Îskender Paşa derbaz bena. Sewbîna Baxçeyê Hevselî ra zî derbaz bena û herikyena Çemê Dîcleyî. 

 

Anzele û Hewza Maseyan heta serrê 1950î zî yew çimeyê muhîm ê bajarî bî. Nê wurdî çimeyê awe serra 1978ine de seba bajarwanî bêsîstem bi temamî ameyî çinkerdiş. Dima ra serê Awa Anzeleyî awanîya îtfaîye ameye awankerdiş. Labelê serra 2004ine de xo newe ra mojna. 

 

Awa Anzeleye ya seba bajar çimeyêke muhîm ê awe ya û seba tutan zî cayê keyfweşîye ya. Seba germê zêde tutî kewenê na awe û dima ra xo danê verê tîjî. Keyeyî zî binê daranê parkî de ronişnenê û benê şahidê keyfweşîya tutanê xo. Bi nê reyde dîmenê rengîn zî vejîyenê werte.