Melek Avci

 

ANQARA - Îqtîdaro ke badê erdlerzî seke mîzgînî bido vat do deynê bacî taloq bikerî û 10 hezar TL hetkarî bidî mexduranê erdlerzî, eksê vatişan deynê bacî hacîz keno. Avûkat Umran Hakverdîye vat ke no hetê huqûq û wijdanî de nîno qebulkerdiş.

 

Şewa 6ê Sibate saet 4.17î de merkezê ci qezaya Bazarcixî ya Mereşî û girdîya ci 7.7 û roja bîn zî girdîya ci 7.6î de di erdlerzî qewimîyayî. Goreyê dayeyanê fermîyan heta nika 43 hezar û 556 kesî dinyaya xo bedelnayî. 11 bajaran de erdlerz texrîbatanê girdan pê ard û bajaran de awanîyê ke zirar nêdîyî nêverda. Bi hezaran awanîyî rijîyayî û yê ke payan ser de mendî zî erdlerzê arçî yê ke erdlerzê girdan ra dima pê ameyî de rijîyayî. Nê bajaran de pêro pîya 13-14 mîlyon kesî cuyayêne û hemwelatîyê ke bê ban mendî ra yê ke hema zî kon nêgirewtî estê. Şarê herême bi paştîdayîşê şarî û rêxistinê komelê sivîlî payan ser de yê. Îqtîdaro ke sozê 10 hezar TL pereyi dabî hemwelatîyan rojanê verênan de pere şirawitbî hesabanê hemwelatîyan. 

 

Bloqe ronayî serê pereyê hetkarîye

 

No pereyo ke seba paştîdayîşî şirawitbî hesaban zî, hetê daîreya bacî ra hesabê hemwelatîyan ameyî hecîzkerdiş. La îqtîdar dimayê erdlerzî vatbî ke do bajaranê erdlerzî de deynê kredîyan yê bankayan, deynê prîmê SGKyî û deynê bacî bêrî taloqkerdiş. Bankayî zî sey mîzgînî dîyar kerdbî ke deynê kesê ke dinyaya xo bedelnayî zî înan pakî kerdî.

 

ÇHDyî ra reaksîyon

 

Komeleya Huqûqnasanê Hemdemî (ÇHD) reaksîyon mojnaye hacîzkerdişê pereyê paştîdayîşî û wina vat: “No pereyo ke seba hetkarî ame dayîş, nêşikeno bêro hacîzkerdiş. No hem hetê huqûqî û hem zî hetê wijdanî de nêeşkeno bêro qebulkerdiş. Ganî bi lez no hacîz bêro wedarnayîş.” Avûkata ÇHDyî Umran Hakverdîye derheqê babete de ercnayîşan kerd.

 

Hacîz bêhuqûqî yo

 

Umrane dîyar kerd ke bi rayîrê hacîzî blokerkerdişê pereyî vera Kanûnê Îflasî yê Îcrayî yo û îcrakerdişê na hetkarîye ca de nîno. Umrane wina dewam kerd: “Hemwelatîyê ke banê înan rijîyayî û zirar dîyî, 10 hezar TL hetkarîya ke ameya şirawitiş zî tede pereyê ke hesabê înan de estbî ameyî hacîzkerdiş. No teberê Kanûnê Îflasî yê Îcrayî yo. Nuqtaya 82ine ya Kanûnê Îflasî yê Îcrayî de banê ke nêeşkenê bêrê hacîzkerdiş estê. No 10 hezar TL ganî nêameyêne hacîzkerdiş, la hacîz kerdî. Sebebê nê zî no yo; çîyo ke dewlete bigêra planê vernî de yo. Kesê ke verê cû deynê înan yê bacî estbî û deyndarê taqîpkerdişê îcrayî bî ra no pere hesabanê înan ra ameyo antiş.”

 

Dewlete prosesê bobelatî de zî fek vera nêdana

 

Umrane qiseykerdişê xo yê peyênan de ard ziwan ke prosesê bobelatî de dewlete kewta pey deynan û wina qedênaye: “Dewlete herinda ke qerarê xo tepîya gam bierza, pereyê hetkarîye tahsîlatê deynî domnena. No nîno qebulkerdiş. 10 hezar TL senî ke kewto hesabê hemwelatîyan tepîya ameyo antiş. Pere eynî ca ra ameyo şirawitiş û eynî ca ra zî tepîya ameyo antiş. Ganî destnêdayîşê nê pereyî bibayêne. Blokekerdişê nê pereyî nîno qebulkerdiş.”