Sema Çaglak - Rabîa Onver

 

DÎLOK - Cinîyê dewê qezaya Islahîye qala problemanê ke cuyenê kerd. Cinîyan da zanayîş ke dewê înan wêran bîyî la heta nika problemê dewe nêameyî çareserkerdiş.

 

Erdlerzo ke 6ê Sibate de pê ame tesîrê xo da 10 bajaran ser û xeylê qeza û dewî zirarêk gird erdlerzî ra dîyî.  No erdlerzî de bi hezaran kesî dinyaya xo bedelnayî, bi hezaran kesî birîndar bîyî û hema zî binê xirban de bi hezaran cenazeyi nêameyî vetiş. Hemwelatîyê herêma erdlerzî ke binê xirban ra xelisîyayî zî şert û mercanê zehmetinan de xover danî û têkoşînê cuye danî. Bi taybetî zî hemwelatîyî probleme hewênayîşî cuyenî. Cinîyê dewê qezaya Islahîye qala problemanê ke cuyenî kerd.

 

‘Cenazeyê ma binê xirban de mendî’

 

Ayşe Macita ke dewa Sulumagarî ya Islahîye ra ya ard ziwan ke erdlerzêk xeylê gird qewimîya û dîyar kerd ke gama ke erdlerz qewimîya serê banî û sobe înan ser de kerwtî. Ayşeye wina dewam kerd: “M abi zorî xo eşt teber. Erdlerzî vera 2 rojan rayîr girewte mendî. Biraza û vistewreyê mi erdlerzî de merdî. Seba ke rayîr girewte bî cenazeyê înan 2 rojan binê xirban de mendî. Xeylê keyeyê dewî weran bîyî, keyeyê ma zî wêran bî. Bado ke 10 roje erdlerzî ra derbaz bî kon dayî ma. Vera înan hemeyan de zî ma wazenê dewa xo bivînî.” 

 

‘Ma 20 kesî konêk de manenî’

 

Rukîye Koçe dîyar kerd ke erdlerzo ke pê ame vera 2 roje rayîrê dewa înan girewte bîyî û 2 rojan kes nêeşka şêro dewe û hetkarî bikero. Rukîyeye wina vat: “Cereyan û awe çinî yî. Ma vewre helnayêne û bado ke bîyêne awe ma şimitêne. Konêk viraşt û 4 keyeyî tede mendêne. Roja ewilîn ya erdlerzî de teber de mendî, zaf xirab bî. Vewr û varan varayêne. Dewa ma wêran bî. Awanîyêk saxlam nêmend. La dima ra hemwelatî û dewlete resayî hetkarîya ma. Ma nika 4 keyeyî ra 20 tenî tîya de konêk de manenî û ma wazenê ke kon bidîyo ma.”

 

‘HDP destê ma girewt’ 

 

Cinîyan ra tewr peynî Nurîye Uzuna ke dewa Kayabaşîye ra ya qisey kerd û da zanayîş ke dewlete nêameye hetkarîya înan û vat: “Roja erdlerzî ra heta nika HDP û hemwelatîyî destê ma girewtî. Pêroyê bajarî seba raşteyê erderzî seferber bîyî. Homa heminan ra razî bibo. Umud kena ke êdî reyna felaketêk winasî nêqewimîyo. Dewlete nêameye dewa ma ya wêrankerde. La şarê ma ma tena nêverda.”