Nişmîye Guler

 

WAN - Endama Heyetê Merkezê Rayîrberîya Herême ya Demokratîke ya HDPyî Xecê Kîye da zanayîş ke sîstemêk demokratîk alternatîf o û vat ke dewlete nêeşkena nê krîzî rayîr biba.

 

Badê erdlerzo gird yê qezaya Bazarcixî ya Mereşî  tesîrêk gird 10 bajaranê Kurdistanî ser de virazîya. Nika hema zî vetişê cenazeyan yê binê xirban de dewam keno. Dewlete OHALî xo rê kena bahane û leşker, qorîcî û hêzê paramîlîteran cayanê erdlerzî de bi ca kena.

 

Endama Heyetê Merkezê Rayîrberîya Herême ya Demokratîke ya Partîya Demokratîke ya Şaran (HDP) Xecê Kîye derheqê rewşa peynîye ya erdlerzî de qisey kerd.

 

'Şar bi rojan o nêeşkeno bireso cenazeyanê xo'

 

Xecêye da zanayîş ke erdlerz tesîrêk gird viraşto û wina vat: "Tay bajarî serubin bîyî. Şar bi rojan o nêeşkeno bireso cenazeyanê xo. Yê ke weş mendî zî nêeşkenê lazimîyanê xo yê cuye ca bîyarî. Pisporê erdlerzî her reye qîrenê û vanê ke erdlerz do bibo û beno ke bi hezaran tenî dinyaya xo bibedelnî. Ewro sîstemê merkezî her qerarî goreyê xo dano. Sebebê yewine yê krîzî no yo."

 

'Dewlete nêeşkena krîz rayra biba'

 

Xecêye dîyar kerd ke serê xetê fayî de awanî virazîyenê û dewam kerd: "Na rewşe tersî zêde kena. Dewlete ewro sinif de mende. Erdlerzî ra hîre roje ra dima şîyî herême. Wexto ke şîyî zî bi komê ke 20 kesan ra pê yenî mudaxale kerdî. La hetî şarî ra seferlerîyêk gird dest pêkerd. Dewlete nê krîzî rayra nêberd la şar rayra berd. Sewbîna OHAL zirarêk gird dano paştîdayîşê şarî. Coka ra zî fatura şarî rê ameye burnayîş "

 

'Hukmat nêwazeno xirbo ke bin de mendo bêro eşnawitiş '

 

Xecêye bale ant astengkerdişê rojnamegeran ke herêma erdlerzî de ameyî astengkerdiş ser û vat: "Hukmat nêwazeno xirbo ke bin de mendo bêro eşnawitiş. Hîrê roje ra dima şîyî herêma erdlerzî û waştî ke çapemenîye goreyê xo dîzayn bikerî. Na nuqtaya peynî ya bêçareserîya hukmatê AKP-MHPyî ya. Her çend ke rayîrberîya herêmî binê destê qeyûmî de biba zî bi hawayêk aktîf nêeşkayî bixebetî. Coka ra zî no qeder nîyo, no qirkerdiş o."

 

'Ma şinê cayê qewimîyayîşî'

 

Xecêye tewr peynî ard ziwan ke ganî her kes şêro herêma erdlerzî û wina vat: "Lazimîya ma bi polîtîkaya ke şarî bixelesna esta. Ma nêeşkenî vernîya afetanê xozayî bigêrî la ma eşkenê vernîya krîzanê girdan bigêrî. Coka ra zî lazimîya ma bi rayîrberîya herêmî esta ya rayîrberîya merkezî nê. Ma do sey Maseya Krîzî ya Erdlerzî ya HDPyî bîyayîşê xo yê herêma erdlerzî dewam bikerî. Ganî ma heme paştîdayîşê girdan bikerî û şêrî herêma erdlerzî.”