STENBOL - Dayîka Ferhat Guneşe ke yew kesê ke hêrişê çekê kîmyewî de dinyaya xo bedelnabi, Çîgdem Guneşe da zanayîş ke destê PDKyî gonîya tutanê înan de ya û vat: "Rayîrê lajê mi şeref, namûs û serkewtişî yo. Semedê nê serberz a. Ganî her kes hemverê caardişê çekê kîmyewîyî vengê xo berz bikero."

 

Tirkîya bi paştdayîşê Partîya Demokratîke ya Kurdistanî (PDK) hemverê herêmê Zap, Metîna û Avaşînî yê başurê Kurdistanî bi çekê kîmyewî hêrîş kerdibi û 17 endamê HPG û YJA STARî dinyaya xo bedelnayî û Ajansê Xeberan ê Firatî nasnameyê 17 heban eşkera kerd. Dima ra zî dîmenê di endamê HPG û YJA STARî ke bi çekê kîmyewî ameyê qetilkerdiş, pare kerd.

 

Dimayê dîmenan hemverê caardişê çekê kîmyewî sere de Kurdistan û xeylêk cayê dinya de kesî vejîyayî kuçeyan û veng dayî ke sazgehê mîyanneteweyî bikewê tevger. Kurd û dostê kurdan dîyar kerdî ke şer û sûcê merdimayî bi hemkarîya Tirkîya û PDKyî ameyo kerdiş û vatî, heta no sûc peynî nêbo, do wareyan de bê.

 

Yew 17 kesê ke bi çekê kîmyewî ameyî qetilkerdişî ra Ferhat Guneş (Sedat Demhat) o.

 

Xîyanet xeyalê xo yê tutîye rê nêkerd

 

Keyeyê Ferhatî dewa Barmanî yê Stewrî yê Mêrdînî ra yo. Stewrî hetê têkoşînê azadîya Kurdî de wayîrê cayêko girîng o û heta nika bi seyan ciwanî tîya ra verê xo dayê koyan û tewrê têkoşînî bîyê. Embazê Ferhatî yê qijî vanê, 'ma vatêne ke ma pîl bibê ma do bibê, mamoste û doktor la ey vatêne, 'ez pîl bibî, ez o bibî gerîla'. 9 serrî keyeyê ey koçê Stenbolî keno. Ferhat, xeyalê xo yê tutîye bi ca ano û 2015ine de verê xo dano koyan.

 

Şerê îradeyî…

 

Ferhat roportajo ke dayo Ajansê Xeberan ê Firatî  (ANF) de sebebê tercîhê xo yê koyan qal keno û vano: “Ez vernê de huyayîşê gerîla ra bi tesîr bîya. Mi vat, gelo ez o zî sey înan bibî?" Ferhat dîyar keno ke semedê azadîya Rayberê PKKyî Abdullah Ocalanî xo ver danê û roportajo peyînî yê ajansî de tunelê şerî de veng dano û vano: "Ma do bi îradeyê xo zorê dişminî berê." Ferhat, dimayê serran bi huyayîşê rîyê xo, hişê embazanê xo de ca gêno.

 

Keye de bêvengî û hêrsêko gird

 

7 serrî ra dima xebera Ferhato ke dinyaya xo bedelnaye şina keyeyê ci rê. Keyeyê Ferhatî de vera dejê girdî hêrsêko gird esto. Keyeyê ke tutanê înan bi çekanê kîmyewîyan ameyî qetilkerdene de bêvengîyêko gird hakim o. Odeya ke ma dekewtî de ma bi persanê xo hewl danê ke bêvengîyan înan bixerepnî. La odeya ke ma dekewtî de 4 dayîkê ke tutê înan têkoşînê azadîye de dinyaya xo bedelnayê û netîceyê têkoşînî de dinyaya xo bedelnayê, estê. 

 

Vatişê ke seba Ferhatî yenê vatiş

 

Ma dayîka ci Çîgdeme goşdarî kenê. Her çend ke vatiş bi zorî fekê aye ra vêjîyê zî dest bi qiseykerdişî kena û vana: “Ferhate Stenbolî ra tewrê gerîla bî. Cuya Ferhatî zaf weş bî. Pêroyê keyeyê ma girêdayeyê dewaye yo. Ma bin ê hîssan pîl bîyî. Way û birayanê xo reyde timî kurdî qisey kerdêne. O metropolan de pîl bî la ziwanê xo ra qet fek vera nêda. Timî bi coş û kêfweş bi. Tutan reyde tut, pîlan reyde zî pîl bî. Zaf bi aqil û merhamet bî. Aye wext lajê mi tena o bî. Timî vatêne daye wa birayê mi bibo. Mi vatênê nê bes o şima hirê tenî bes ê. Vat ‘dayê nê wa kurdî zêde bibê’. dima ra di birayê ci virazîyayî. Dima ra vat ‘dayê di lajê toy ê bînî virazîyayî. Wa di heb bibê yê to û yew zî wa bibo yê Kurdistanî’."

 

Reya yewine mi televizyon de dî

 

Çîgdeme dîyar kerde ke Ferhat hêrişanê DAIŞî yê hemverê Kobanîyî de xeylê tesîr bî û wina dewam kerde: “Timî cuya cinî, tutan û kesê ke uca de cuyenê nimune nişan dayene. Ferhat serra 2015î de keye ra vejîya û 15 rojî dima ma televizyon de ci dî. Ma bi dîmenanê ci sereberz bîyî. Qesebaya xeylê dayîkan vêşaye. Ez zî înan ra yew a. Ez zî sey pêro dayîkan wazena şer vindero. Ez do heta peynî dewleta tirke ra hesab bipersa. Kam cû şer beno wa bibo şixulnayîşê kîmyasalî raşt nîyo. no sûcê merdimayî yo.”

 

‘Destê PDKyî de gonîya înan de yo’

 

Çîgdeme reaksiyon nîşanê xîyanetê PDKyî û destronayîşê serê maskeyanê gazî da û vat: “PDK vernîya nê şerî akerd. Seba mi dişmeno tewr pîl PDK yo. Wa no rayîrî ra agêrî. Destê înan gonîya tutanê ma de yo.”

 

‘Ganî her kes wirzo payan ser’

 

Çîgdeme sewbîna bale ante bêvengîya hemverê şixulnayîşê çekanê kîmyewîyan ser û na babete de zî înan vat: “Ganî şar hemverê nê caardişan de vejîyo û vindertişêk xurt nişan bido. Tutê ma senî canê xo feda kerdî, ganî şarê ma zî wayîrê înan vejîyo. Eke şarê ma werizo payan ser do na rewşe vindera. Wa şarê kurd werizo payan ser. Wa qesebaya dayîkan nêvêşa.”

 

‘Ferhat lajê ma pêronan o’

 

Çîgdeme peynîya qiseykeridşê xo de veng daye û vat: “Ez şarî ra nê çîyî wazena. Her welatî de şixulnayîşê çekê kîmyewîyî sûcêko lêmin o. Ganî yew şerî de daxî nêrî şixulnayîş. Ferhat tena lajê mi nîyo, lajê ma pêronan o. Ganî ma hemverê nê şero lêminî de hişyar bibî. êdî wa dayîkî nêbermê."