STENBOL - Cinîyê femînîstî dîyar kerdî ke qetilkerdişê endama Merkezê Cigêrayîşê Jîneolojî û edîtora kovara Jîneolojîye, rojnameger û akademîsyen Nagîhan Akarsele dewamê polîtîkaya şerî yê îqtîdarîye yê û wina vatî: “Qetilkerdişê Nagîhane hêrişêko vera têkoşînê ma pêro kesan o. Ma bi nê zihnîyetî têkoşînê xo dewam kenê.”

 

Endama Merkezê Cigêrayîşê Jîneolojî û edîtora kovara Jîneolojîye, rojnameger û akademîsyen Nagîhan Akarsele bajarê Silêmanîye yê Herêma Federal ya Kurdistanî de 4ê teşrîna verêne de verê keyeyê xo de netîceyê hêrişo çekdarin ê suakîstî de ameye qetilkerdiş. Nagîhane serê jîneolojîya ‘zanitê komelkî û cinîye’ de xebatan rayra berdêne. Qetilkerdişê aye Kurdistan, Tirkîya û xeylê cayanê dinya de ameye protestokerdiş. Nagîhana ke têkoşînê cinîyan de serkeşe bî. Seba ke paradigmaya azadîwaştişî ya cinîyan ya Rayberê PKKyî Abdullah Ocalanî bida zergunkerdiş, pêroyê cuya xo de têkoşîn kerde. Pêro cayan de cinîyî bi siloganê ‘Cinî, Cuye, Azadî’ vejîyayî raşteyan û qetilkerdişê Nagîhane protesto kerdî û sond dayî ke têkoşînê aye do dewam bikerê. Cinîyê xoser femînîstî derheqê qetilkerdişê Nagîhane de ajansê ma rê qisey kerdî.

 

‘Qetilkerdişê Nagîhane dewamê polîtîkaya şerî yo’

 

Femînîsta xoser Hulya Osmanagaogluye da zanayene ke qetilkerdişê Nagîhane netîceyê polîtîkayanê şerî yo û no hêriş vera têkoşînê cinîyan û têgêrayîşê siyasî yê cinîyanê kurdan de virazîya yo. Hulyaye qiseykerdişê xo de wina vat: “Îqtîdar vera têkoşînê cinîyan yê kurdî de bi polîtîkayê zîndanî ra sînordar nêbeno û sere dano suîkastan. Dewlete vera têkoşînê xelisîyayîşê cinîyan de têkoşîn dana. Embaza ma Aysel Tugluke nîna veredayîş, terke mergî yena kerdiş. Embazê ma yê ke 25ê Teşrîna Peyêne de û 8ê Adare de tewrê eşkerayîye bîyî, bi desan serran yenê muhakemekerdiş. Nuqtaya tewr peynî zî qetilkerdişê embaza ma Nagîhane bî.”

 

Hêrişê vera têgêrayîşê cinîyanê kurd…

 

Hulyaye dewamê qiseykerdişê xo de dîyar kerde ke têkoşînê femînîstî û cinîyan her ke şino berz beno û wina dewam kerde: “No îqtîdar her ke keweno tengî hêrişê cinîyan û têkoşînê înan keno. Têgêrayîşê cinîya kurde bi hêrişanê tewr giranan reyde rî bi rî maneno. Prosese Pêkerdişê Stenbolî de xespkerdişê heqê nefeqeyî û meşrukerdişê qeyûmê ke ameyî tayînkeriş… Nê pêro nimuneyê hêrişanê vera têkoşînê xelisîyayîşî yê cinîyan ê.”

 

‘Do têkoşînê Nagîhan û Jîna dewam bikero’

 

Hulya qiseykerdişê xo wina qedêna: “Îqtîdar şexsê Nagîhane de hemverê pêro cinîyê ke fikre xo anê ziwan û vatişê xo vanê, hêriş de yo. Esas de no mesajê ke heta prosesê weçînayîşî de senîn hêrişê têkoşînê xelasîya cinî bikerê, danê. Şertê Tirkîya de demêk derg o tevgerê femînîst, tevgerê cinîyan û tevgerê cinîyanê Kurdan pîya têkoşîn kenê. Semedê nê zî qetilkerdişê Nagîhane hêrişêko hemverê têkoşînê ma yo. Bi nê hişmendî ma do têkoşînê xo dewam bikerê. Ma do têkoşînê Nagîhan û Jîna Mahsa ke ameyî qetilkerdiş, dewam bikerê.

 

Pêro dinya hemverê qetilkerdişî bêveng o

 

Femînîste, nuştoxe û rojnamegere Ayşe Duzkan zî bale ant serê vatişê wezîrê Karê Zereyî Suleyman Soyluyî sey, ‘PKK tevgerêkê cinîyan o’ û dîyar kerd ke semedê nê îfadeyan sazgehê cinîyanê Kurdan hedef ameyo girewtiş û wina vat: “Têkoşînê azadîya Kurdî de ma rolê cinîyan zanê û dewlete zî nê baş zana. Semedê nê zî hêrişê hemverê Nagîhane, qetilkerdişê aye hemverê şarê Kurdî, tevgerê azadîya cinîya kurde yo. Qetilkerdiş Silêmanî de ame kerdiş. Komara Tirkîya nêeşkena kesêk qetil bikera, nêeşkena nê sûcî bikera û hele welatêkê bîn de caardişê nê serebûtî, yeno manaya ke heqê şarê ê welatî binpay kena. Platformê mîyanneteweyî, NY, YE veng nêvejenê û eynî wextî de welatê ke ci de ameyo kerdiş zî veng nêvejeno. No problemêko gird o.”

 

Venga têkoşînê hempar

 

Ayşe qiseykerdişê xo wina qedêna: “Dimayê qetilkerdişê Nagîhane, Îran de zî hemverê sazgeh û partîyê Kurdan hêrîş ameyo kerdiş. Hukmat eşkerayî da la babete eşkerayîye nîya. Qet nêbo ganî welatê bînî destur nêdê welatê înan de suikast bi ca bêro. Hemverê nê  hêrişan de bi femînîstê Tirkîya reyde têkoşînêko iyeyê re têkoşînek hevpar yeno dayene. Cinî têkoşînêko enternasyonal heq kenê. Latîn Amerîka, Iraq, Îran, Lubnan de nê têkoşînê ma hempar ê. Derdê me patriarkal o û goreyê mi ma gam bi game werte ra wedarnenê.”