Şehrîban Aslan 

 

AMED - Medenî Yildirim, Lîcê de çalakîya duştê talanê xozayî de amebî qetilkerdiş. Dadîya ey Fahrîye Yildirim wina vat: "Qatilî tever de ciwîya xo domnenê la tutê ma binê erdî de yê." 

 

Serebûtê Gezî di 2013î de Stenbol de duştê qirkerdiş û talanê ekolojîkî de ame destpêkerdiş û dimayê nê Licê yê Amedî de zî duştê viraştişê qereqolan û kalekolan de çalakî amebî destpêkerdiş. Di wurdî çalkîyan de zî xeylêk kesî ameyî destbendkerdiş, tepiştiş û qetilkerdiş. Di dewa Hezanî ya Licê ya Amedî de 28ê Hezîrane ya 2013î de di protestoyê qereqolan de, Medenî Yildirimo 19 serre zî hetê esker Adem Çîftçî ra ame qetilkerdiş. 

 

Dewaya verguman Adem Çîftçîyî ame akerdiş de verguman ame pawitiş û netîceyî de ame beratkerdiş. Muhakemekerdişê neweyê verguman Adem Çîftçî de zî roniştena qerarê 2021î de ame vînayîş û verguman reyna hetê dadgehe ra ame beratkerdiş. Dadîya Medenî Yildirimî, Fahrîye Yildirime prosesê hukmî erjna û vat, ê ke xo ver danê, ya yenê qetilkerdiş yan zî bi serran ceza gênê û vergumanî zî yenê xelatkerdişî. 

 

'Yew kesî ra ame qetilkerdiş lajê mi bî' 

 

Fahrîye da zanayene ke bi hezaran merdimî Gezî û Licê de duştê qirkerdişê ekolojîkî de xo ver dayê, duştê talanî de têkoşîn kenê û wina vat: "Çîyê ameyê ciwîyayîş eynî demî de prosesê çareserîyî de ameyî ca. Ê demî de vengê sîlehan vindertbî, merg çinêbî. Hewayê aştî bîbî. Dima ra wurdî cayan de zî duştê talanê xozayî de û Lîcê de zî duştê viraştişê qereqol û kalekolan de xoverdayîş ame ca. Xoza ameyê talankerdiş. Çalakgêrê ke tu sûcê înan çinîbî ameyî qetilkerdiş. Yew nînan ra lajê mi Medenî bi. La her kes zaneno ke dewlete çîyan kena behane û ciwan û tutan qetil kena. Fînak, Berkîn Elvan hema tut bi ame qetilkerdiş." 

 

'Bi behaneyan ciwanî qetil kerdî' 

 

Fahrîye dewamîye de eşkera kerd ke, Medenî ciwanêke wayîrê hişmendî bîyo û wina vat: "Rojêke vat 'Dayê Kurdî her tim aştî û çareserî wazenê. Do aştî bêro ca û ciwanî nêmirê. La Kurdî key sere wedarenê yenê kiştiş'. Merdiman nêwaştêne kes  bimiro û nêwaştêne qereqolî bêrê viraştiş. Vera nê zî ciwanî ameyî qetilkerdiş. Şaristananê Rojawanî de zî Gezî kerdî behane û ciwanî qetil kerdî." 

 

'Dosyaya ey her reyî amî padayîş' 

 

Fahrîye wina dergî da qiseyanê xo: "Dimayê qetilkerdişê Medenî ma têkoşînêko pîl da û prosesê dewa dest pêkerd. Dosyaya lajê mi 2 reyan amî padayîş. Seki qerefnayîşê xo bi ma bikerê îfadeyî girewtî û dewa padayî. Vatê dewayêke girêdayeyê rêxistine ya û padayêne. Serê heme hewldayîş û îtîrazanê ma de reya hîrêyîn da akerdiş. Medenî kes nêkişt, tu sûcê ey çinîbi. Ma vajê sûc zî kerd, tu kes merg heq nêkeno. Lajê mi xeylêk jîyatî bi. Derûdorê xo rê xeylêk bi feyde bi. Hem lajê mi bi hem embazê mi bi. Bi her tewirî hemrayê mi bi. Dersanê xo de serkewte bi. Amancê ey no bî ke, bibo wayîrê meslekêke baş. Vatêne ez bibî wayîrê meslekî, wa feydeyê mi zî Şarê Kurdî rê bibo. Bi cesaret bi. Wa Homa heqê ey nêverdo." 

 

'Dewa berdê îstînafî' 

 

Fahrîye wina peynî ro ci ard: "Vergumanê merdimê di Gezî de ameyî qetilkerdiş nêameyî cezakerdiş. Vergumanî tever de ciwîya xo domnenê û tutê ma kewtê binê erdî. Di roniştena peynî de reyna dewa amî padayîş. Mi salone ya dadgehe de sere wedarit. Înan zî vat 'Tîya axur nîyo'. Mi vat 'Ez zî qurbane nîya'. Ma qetil kenê vanê veng mekerê. Polîsan hêrişê ma kerd. Dewa şî îstînafî. Dima ra zî ma do avûkatanê xo dir berê heme mercîyan."