Medya Uren 

 

MÊRDÎN - Gelîya Xursî ke 12 dewan ra yena meydan, bi bax û baxçeyê xo, bi çirtanê xo û keyeyê xo yê tarîxî rê her serre xeylêk turîstan ancena verê xo.

 

Mêrdîn bajarêko wina yo ke xeylê şaristaniyan ser de dest pêkerdê û peynî bîyê. Rexmê hêriş, tehdîd û koçberkerdişê dewleta tirkî ser de kerdo zî cîyayê xo yê kultur, ziwan û xozayî pawito. Her qezayê ci, kuçeyê ci bi boya tarîxî û zafrengî xo dir, mird keno. Yew bajarê ke tewr zêde turîstan anceno yo. Eke şima seba turîstî serdayîşê Mêrdînî kerd lazim o gelîya Xursî zî nêkerê xo vîr ra. Mabêne gangoleka şaristanîyî de, deşta mezopotamyayî cenetêk nimite ya.

 

Cayê turîstan a

 

Gelîya Xursî serê qezeya Qosera Mêrdînî de ya, 12 dewan ra yena meydan û bi qasê 6 kmyî dergîya xo esta. Serê deşta mezopotamyayî de gelîya Xursî sey cenetêk nimite ca gêna. Bi berzî, çem, xoza yan zî viraşteyê xo yê tarîxî ra bale ancena. Keyeyê ci, dêr û camîyê ci yê tarîxî estê. Her serre xeylêk turîstê xerîbî û roniştoxê tîya yenê nê cenetî.

 

Debara xo bi tûtinê bi name û vengî kenê

 

Roniştoxê gelîya Xursî seba xozaya xo debara xo tewr zêde bi ramitiş, pesdewarî û masegirewtişî kenê. Tîya tûtinê bi name û veng bi destê cinîyan yeno ramitiş û zergûnkerdiş. Ya ke tewr zêde bale anceno zî viraştişê baxçeyê ci yê. Sewbîna serê tesîsê boydaşî zî maseyî yenê pîlkerdiş û yenê rotiş. 

 

Xoza lêşin mekerê! 

 

Gelîya ke bi xozaya xo bi name û veng a êdî êdî mîyanê çopê turîstan de vînî bena. Çemo ke xeylê zindî pê mird benê, mîyanê lêşinî de yeno verdayîş. Yê ke yenê eşteyê xo derûdorî de verdenê. Roniştoxê tîya zî seba çareserî tabelayê serê "Hetê heyetê Xursî ra qerar ameyo girewtiş ke kes adir nêfîno ta, asnawî nêkero”. Serê çemî de zî seba derûdor nêro lêşinkerdiş tabela ameyê ronayîş.