Kîbrîye Evren

 

STENBOL - Hemsereka DADî Kadrîye Dogan vat, dewlete bi nêzdîbîyayîşê heyfgirewtişî nêzdîyê Aysel Tugluk bena û vat, ganî elewî çîyê ke Aysele rê yenê kerdiş baş biwanê û vat: "ma nuqtaya ke bîyayîşê ma bi tu hawa nîno qebûlkerdiş û waştişê ma ca de yê."

 

Hemsereka Kongreya Komela Demokratîke (KCD) Aysel Tugluk 5 serrî yo tepişte ya. Aysele ke zîndanê Tîpê F yê Kandira de manena, teşhîsê nêweşîya Demansî ci rê ame kerdiş. Pêwa vengdayîşê cinîyan û rayaumumî nînê tahlîyekerdiş. Aysele 1ê Sibate de berdî ATK û hîrê rojan uca de mende. Pêwa ATKyî tespîtê nêweşîya ci tespît kerd zî raporê ‘berpirsyarîyê ceza esto' dayî.

 

Hemseraka Komeleya Elewîye ya Demokratîke (DAD) Kadrîye Dogan derheqê Aysel û tepişteyanê bînan yê nêweşan de qisey kerd.

 

Zîndan bîyê pirrî cinî

 

Kadrîye vat, tarîxê komare de reya ewil o hende cinî tepişte yê û vat: "Bi rastî komel de krîz û bêzarîyêk pîl esto. Bi rastî ganî rayîrêk vejîyayîşê nê bibo. Her roje cinî yenê qetilkerdiş, xoza yena talankerdiş, kede yena binpaykerdiş. Ma hawirêk wina de yê. Ma wayîrê xozaya xo vejîyê. Destkewtişê cinîyan estê û her tim binê hêrişan de yê."

 

Nasnameyê elewîyan ê kurdan ra heyf gênê

 

Kadrîye bale ant serê rewşa Aysel Tugluk zî vat, îqtîdar bi mantiqê heyfgirewtişî nêzdîyê nasname, bawerî û têkoşînê Aysel Tugluke beno û vat: "Hemverê şexsîyetêk xeylêk bi erj yê sey Aysele rewşa heyfgirewtişî babeta vatişî ya. Aysel nêweşa Demansî ya. Cenazeya dadîya xo de xeylêk bi tesîr bîya. Nuqteyê peyîn yê bêwijdanî dayî ciwîyayîş. Aysele zî zîhnê xo pada û no zaf normal bi zî."

 

‘Ganî elewî wayîr vejîyê'

 

Kadrîye dewam de wina vat: "Tena Aysele ney bi hezaran tepişteyê sîyasî bi eynî caardişî dir rî bi rî yê. ATKyî raporê tipî çin hesibnayo û vano eşkena tepişte bimano. Nasname, bawerî û têkoşînê Aysele ra heyf gênê. No het ra ez vana. Ganî ma elewî nê baş bivînê û bierjnê. Ganî ma wayîrê Aysel Tugluke vejîyê. Aysel Tugluke nimûneyêke ya. Aysele ganî saetêke zî tepişte nêmano. Zirarêk pîl dano ci. Heme tepişteyî tecrîdî dir rî bi rî yê."

 

Heme zîndanan de dewre de yo

 

Kadrîye bale ant serê tecrîdî û vat: “Tecrîdê Îmraliyî heme zîndanan de dewam keno. Tecrîd Îmraliyî de dest pêkerd û heme zîndanan de dewam keno. Tesîr serê heme kesan de kerdo. Tirkîya bi nê nêzdîbîyayîşê heyfgirewtişî hem qanûnê xo hem zî pêkerdişê mîyanneteweyî binpay kerda. Tirkîya goreyê qerarê Dadgeha Heqê Merdiman ê Ewropayî (DMME) tênêgêrena. Pandemî de qanûnêk vet. Heme tepişteyê edlî vetî la yê sîyasî zere de verdayî."

 

Ganî ma bala xo bidê yê zerreyî

 

Kadrîye wina qal kerd: "Ganî ma teslîmê tersê ke îqtîdar awan kerdo, nêbê. Atmosferêk wina awan kerdo ke her çî asteng keno. La tu feydeyê tersî çin o. Ma çiqas bitersê do serê ma de bêrê. Ganî ma bi wijdan û hîsê xo rê berpirsyarîyê xo bi ca bîyarê. Hemverê tersê ke îqtîdar awan kerdo, hêzê rêxistinkerde de do enerjîya komelî vejo werte. Hêzê rêxistinkerde înan zaf terseno. Hêzê rêxistinkerde zaf girîng o.”

 

Ganî vatişê xo vajê

 

Kadrîye tewr peyîn wina vat: “Hemverê erjê azadîya komelî û cinîyan sîstemêk dişminî esto. Ganî sazgehê Elewiyan hemverê nê tedayan û hêrişan bibê yew û bêrê têhet û vatişê xo vajê. Ganî sazgehê elewî vatişê xo tewr berz bîyarê ziwan, helwestêk cîdî ramojnê. Yanî ma Elewî vanê ke ma têduştî pawenê, ma azadîya cinî pawenê. Ma ewnîyenê sîstemêko dişminê cinîyan hemverê ma de yo. Ganî ma vera nê vengê xo berz bikerê. Ez tena veng nêdana Elewîyan. Ez veng dana heme sazgeh û kesê ke wayîrê wijdanî yê. Cayê ke edelat çinbo huqûq zî çin o. Ma bi rastî nê zulmî heq nêkenê. Ganî xesasîyet ramojnê û vengê xo berz bikerê."