Sema Çaglak

 

AMED - 13 serrî serê qetilkerdişê Mahsum Karaoglan ke pîrozbayîyê 4ê Nîsane de ame qetilkerdiş ra derbas bi. Dadîya Mahsumî, Sultan Karaoglan dîyar kerd ke hema zî ciwanê kurdî yenê qetilkerdiş û wina vat: “Dejê ma qet kêm nêbi. Ma do heta peynî zî dewaya lajê xo bikerê.”

 

4ê Nîsane 2009in de seba rojbîyayîşê Rayberê PKKyî Abdullah Ocalanî pîroz bikerê bi deshezaran kesî verê xo dayî dewa Amaraya qezaya Xelfetîyê Riha. La polîs û leşkeran waşt ke bi hezaran kesê seba pîrozbayî şinê Amara, asteng bikerê û polîsan hêrîşê girseyî kerd. Netîceyê hêrîşê ameyî kerdiş de Mahsum Karaoglan û Mustafa Dag dinyaya xo bedilnayî, xeylêk kesî ameyî birîndarkerdiş û xeylêk înan ra zî amebî destbendkerdiş.  Derheqê kiştişê Mustafa Dag û Mahsum Karaoglan de Dozgerê Komare ya Bêrecûkî cipersayîş dayî destpêkerdiş, la heta ewro cipersayîş de tu averşîyayîş nêvirazîyayo.

 

Dadîya Mahsum Karaoglanî, Sultan Karaoglan bi minasebetê serrgera qetilkerdişê lajê xo ajansê ma rê qisey kerd.

 

‘13 serrî edalet bi ca nêame’ 

 

Sultane diyar kerd ke serê kiştişê Mahsumî ra 13 serrî derbas bîyo la hema zî edalet bi ca nêameyo û vat: "A roje xeylêk kesî seba rojbîyayîşê Abdullah Ocalanî verê xo dabî Amara. Mahsûm zî o wext unîversîte de beşê matematîkî wendêne. Unîversîte ra şibi dewa Amara. Mahsûm uca de hetê polîsan ra ame qetîlkerdiş. Pêwa ke 13 serrî derbas bi zî ne dejê ma derbas bi, ne zî kiştoxî ameyî muhakemekerdiş. Seba cipersayîş bêro destpêkerdiş ma xeylêk rey muracatê dozgerî kerd la her wext muracatê ma bêcewab mendî.”

 

‘Mahsûmî tim derûdorê xo de tesîrêk verdayîne’ 

 

Sultane, dîyar kerd ke Mahsûmî wendiş ra zaf hes kerdêne û serê her kesî de tesîr viraştêne û vat: “Her  4ê Nîsane de vana qey eynî roje ya. Sey Mahsûm ewro şîyo û do reyna agêro keye û paweyê ci bî. Sey hema zî wendekar o û şino wendegeh hîs kena. Mahsûm zaf jîyatî bi û wendiş ra zaf heskerdêne. Serekî ra xeylêk tesîr bîne, waştêne serê rayî rê ey de şêro. Xeylêk girêdayê têkoşînê azadî bi. Her het ra wayîrê fikrêke bi. Vurnayîş esas girewtêne. Tim mi rê pêşnîyaz kerdêne. Vatêne dadî rayberî kenê, ganî ti rayberî bikerê.”

 

‘Hema zî ciwanê kurdî yenê qetilkerdiş’

 

Sultane vat, sey Mahsûmî bi hezaran ciwanî estê ke yenê qetîlkerdiş yan zî yenê tepiştiş û wina dewam kerd: “Dejê ma qet kêm nêbi. Ma heta peynî zî dewaya lajê xo kenê. Çi heqê înan estbi ke tutanê ma qetil kerdî. Tena seba rojbîyayîşê Serekî şîbî pîrozbayî. O wext xeylêk kes zî birîndar bibi. Ma nêwazenê êdî ciwanê ma bêrê qetîlkerdiş yan zî bêrê tepiştiş. Êdî bes o, dejê dadîyan zaf zêde yo.”

 

‘Ma azadîya Abdullah Ocalanî wazenê’

 

Sultane tewr peyîn wina vat: “Abdullah Ocalan bi serran o tepişte yo. Ma wazenê bi hawayêke azad rojbîyayîşê ci pîroz bikerê. Ganî bê asteng rojbîyayîşê ci bêro pîrozkerdiş. La nêverdenê û hêriş kenê. Ma wazenê Abdullah Ocalanî ra xebere bêro girewtiş. Çend serrî yo tu zanayîş çin o. Ganî keye û avûkatî ci ra xebere bigîrê. Ganî ey dir pêvînayîş bêro kerdiş.”