ANQARA - Avûkatê tepişteya nêweşe Muhlîse Karaguzel, Abdulbakî Çelebî, dîyar kerd ke mehnayê tepiştişê Muhlîse tewrbîyayîşê eşkerayîyê çapemenî, tewrbîyayîşê cenaze û eşkerayîyan de berzkerdişê slogan o û nê heme zî vernîya 2015 de ameyê kerdiş.

 

Tecrîdê serê Rayberê PKKyî Abdullah Ocalanî serê heme hetê komelî û bi taybet zî tesîrê xo zîndanan ser o kerdo. Binpaykerdişê heqn ê hemverê tepişteyan roj bi roje tewr giran beno.

 

Goreyê raporê ÎHDyî yê 2020ine zîndanan de 604 ci ra giran bi pêroyî hezar û 605 tepişteyê nêweşî estê. Pêwa polîtîkayê şîdet, îşkence û tecrîdî, binpaykerdişê heqan bi pandemî dir zêde bî. Mengêke de seba binpaykerdişê heqan xeylêk  cenezeyî zîndanan ra vejîyayî. Tepişteyî zîndanan de hewl danê ke vengê xo bidê eşnawitiş. 6 serrê peyînan de 103 tepişteyî, serra 2021î de 64 tepişteyan, zîndanan de dinyaya xo bedilnayê. Çend aşmê peyîn de zî Garîbe Gezer, Abdurrezak Şuyur, Halîl Guneş, Bangîn Muhammet, Îlyas Demîr û Vedat Erkmen dinyaya xo bedilnayî.

 

Dosya hema dadgerî de ya

 

Tepişteya nêweşe Muhlîse Karaguzel lîsteyê tepişteyê nêweşna de ya. 11ê Tebaxa 2019 de Muş de sereştişê keyeyan de ameye destbendkerdiş û hetê Dadgerîya Cezaya Sulhî ra bi mehnaya endamîya rêxistine ameye tepiştiş. Roniştişê qerarê dewaya  16ê êlule 2020î de 2yîn Dadgeha Cezaya Giran ya Muşî de ameye vînayîş, bi îdiayê endamîya rêxistine 8 serrî û aşmêke ceza ci rê ameye dayîş. Dimayê ke ceza îstînaf de ameye tesdîqkerdiş, avûkat dewa berd dadgerî. Dosya hema dadgerî de yena vindarnayîş û 2yê Kanûna 2021 de hetê 2yîn Dadgeha Cezaya Giran ya Muşî ra bi mehnaya Muhlîse 2012 de tewrê cenazeya Kadrî Çelîk ke PKKyij bi, bi îdiayê propagandayê rêxistine kerda 10 aşmî ceza dayî.

 

Endamê Yewîya Baroyan ê Tirkîya (TBB) û avûkatê Muhlîse, Abdulbakî Çelebî derheqê dosya de qisey kerd.

 

'Mehna tewrbîyayîşê eşkerayî ya'

 

Abdulkbakî wina dîyar kerd: “Îdiayê sey berzkerdişê sloganan û tewrbîyayîşê eşkerayîyê çepemenî dosya de ca gênê. Muhlise Muş de hemserekî kerda. Tewrbîyayîşê eşkerayîya partî, ÎHD û STKyan bahane ramojnenê. Heme eşkerayî zî vernîya 2015ine yê. Sûcdarî bi pêroyî eşkerayî û tewrbîyayîşê di  cenazeyan o. Dosya nika dadgerî de vindarnayê."

 

Muhlîse zî kewtw verê astengîyê ATKyî

 

Abdulbakî dewam de wina vat: "Şertê ke dayê vernî, şertê giran ê. Nê şertî seba kesê ke felç û nêeşkenê têbigeyrê yê. Eşkena bêro dermankerdiş yan ney? Çîyê ke cuye kenê rîsk, ganî tahliye bêro kerdiş. Heta dermankerdiş biqedo ganî destûr bêro dayîş. La çi heyf, mekanîzma cîya xebityena. Rewşa bi pêroyî ATK rê mendo. Pêwa 5-6 nêweşîyan muvekîla mi estê û cuya aye kewena tehluke zî bi raporê ATKî nêameye veradayîş."

 

‘Demê ke ardî roniştiş bi binpaykerdişê dir ameye rî bi rî'

 

Abdulbakî wina vat: “Muhlîse hetê Dadgeha Cezaya Giran ya Muşî ra ameye muhakemekerdiş. Destpêkê dewa de surgunê zîndanê  Kayserî kerdî. Ma avûkatî Muş de bî. Dewa serê SEGBÎSî de ameye kerdiş. Reya bîn zaf problem ciwîyabî. Reyke bîn zî ma waştiş nêkerd. Bi rîng ardibî. Awe û nan kêm dabî. Coka ma êdî waştiş nêkerd.  Cejndermeyan Muhlîse tehdîd kerdibî. Ma derheqê nê de gerre bikerê."

 

‘Surgunî cayê dûr kenê’

 

Abdulbakî tewr peyîn wina vat: “Surgunkerdiş yeno manaya ke keye zî yenê cezakerdiş. Prosesê muhakemekerdişî de surgunkerdiş yeno manaya binpaykerdişê heqan.  Zîndanan de krîter raporê ATKyî yê. Ganî rayaumumî, wezaretê dade, hukmat bi xesasiyet nêzdîyê na babete bibê. Komîsyonê Heqê Merdiman ê TBByî na babete de xebityeno. Demo ke xebatî peynî bibê do neqlê Wezareta Dade bikerê. Rewşe bi rastî qet baş nîya. Her ke şino hûmare zêde bena. Ganî hemverê nê hîsgêrî bêro ramojnayîş."