Rojda Aydin  

 

ŞIRNEX - Dayîkê Aştîye yê Şirnexî tecrîdo girankerde yê serê Rayberê PKKyî Abdullah Ocalanî şermezar kerdî û vatî: "Tecrîd tesîr serê pêro cuye de keno. Seba nê zî ganî têkoşînêkê hempar hemverê tecrîdî bêro kerdiş."

 

Avûkatê Rayberê PKKyî Abdullah Ocalanî, seba bi muwekîlê xo dir pêvînayîş bikerê, mîyanê hewteyî de 2 rey muracat kenê, la nê muracatê avûkatan ne pozîtîf, ne zî negatîf cewab nîno dayîş. Nê ser de  avûkatî 22yê teşrîna peyêne de Dadgeha Ceza ya Bûrsayî rê muracatê "pêvînayîşê lezgîn" kerdî. Dimayê nê uracatî vejîya werte ke di  cezayê newe yê qedexeyê pêvînayîşî Abdullah Ocalanî rê ameyê dayîş. Dadgerî, muracatê avûkatan red kerd û sey mehna zî cezaya ke 12ê teşrîna verêne de 6 mengan Abdullah Ocalanîrê ameya dayîş, ramojnayê. Dadgerî, seba muracatê pêvînayîşê keyeyî zî qedexeyê pêvînayîşî yê 18ê tebaxe de seba 3 aşmî bahane ramojna. La dadgerî derheqê bahaneyê qedexeyan de tu zanayîş nêda avûkatan.

 

Avûkatê Abdullah Ocalanî, Rezan Sarica û Newroz Ûysal, dimayê 8 serran 2-22ê gulane, 12-18ê hezîran û 7ê tebaxa 2019 de pêvînayîş bi muwekîlê xo dir kerdibî. Sewbîna tewr peyîn zî seba îdiayê ser hesabê medyaya dijîtalî yê derheqê Abdullah Ocalanî de endîşeyê rayaumumî pîl bîbî û 25ê adare de birayê Abdullah Ocalanî, Mehmet Ocalan bi telefon qisey kerdibi. La Mehmet Ocalan neqlkerdibi ke pêvînayîşê telefonî nîme de ameyo birnayîş.

 

Endamê Meclîsê Dayîkê Aştîye yê Şirnexî Emîne Alkiş û Rihan Arsoy derheqê tecrîdî de ajansê ma rê qisey kerdî.

 

‘Pêvînayîş nîno kerdiş'

 

Emîne Alkiş, destpêkê qiseykerdişê xo de tecrîd şermezar kerd û vat: "Tecrîdo ke Îmraliyî de yeno kerdiş, tesîrê xo pêro ciwîyayîşî de keno. Serekê ma tena waştişê hizûr, aştî û têduştî keno. Serekê ma cuyêka aştî wazeno bêro awankerdiş. Seba nê ma tecrîdê serê serekê xo tu wext qebûl nêkenê. Wa ganî tecrîd bêro wedaritiş. Ganî cinî û ciwanî dorê serekê xo de bibê xelek û ma nê tecrîdî bişikinê. Bi çend serrî yo ne keye û ne zî avûkatî eşkenê şêrê pêvînayîş."

 

‘Ganî kurdî bi tifaq bê' 

 

Emîne, dewam de wina vat: "Her ke şino şer, destbendkerdiş û tepiştiş zêde beno. No zî parçeyêkê tecrîdî yo û tesîr serê komelî de keno. Sewbîna no tecrît bi taybetî heme zîndanan de yeno dewamkerdiş. Tepişteyî bi îşkence, zilm û zordarî dir rî bi rî yê. Mîyanê aşmêke de 7 cenaze zîndan ra vejîyayî. Ma nêwazenê cenazeyî zîndanan ra vejîyê. Hemverê her tewir hêrişan de ganî tifaqê kurdan laver şêro. Hemverê zulmî de ganî ma pîya wurzê. Sewbîna ma do her hawa wayîrê serekê xo vejîyê û ma azadiya ey wazenê."

 

‘Tirs û fikarê ma zêde benê'

 

Rihan Arsoy zî wina bale ant serê tecrîdî: "Dewleta Tirkî destûr nêdana ke keye û avûkatî şêrê Îmrali û pêvînayîş bikerê. Seba pêvînayîş nêro kerdene, bahaneyê cîya vejenê vera keye û avûkatan. Astengîyê ke hemverê pêvînayîşî yenê vetiş ters û endîşeyê ma pîl kenê. Edaletê na dewlete çin o û her ke şino tecrîd tewr giran kena."

 

'Ganî avûkatî şêrê Îmraliyî'

 

Rihane, dîyar kerd ke ganî avûkatî şêrê Îmraliyî û pêvînayîş bikerê û vat: "Ma wazenê serekê ma zî sey heme serekê welatê bînan azad bibo û mîyanê şarê xo de bibo. Hemverê zilmê bîyaye ganî yewîya  kurdan aver bo. Eke ma pîya wurzê serê lingan ma eşkenê tecrîd bişikinê. Ma kurdî tena cuyêka azad û bi hizûr wazenê."