Rojda Aydin 

 

ŞIRNEX - Mesajê cinsperestî ke bi rayîrê medyaya dijîtalî de cinîyan rê yenê şawitiş, demê peyîn de zêdeyêr bîyê. Rengîn Onuk, dîyar kerd mesajê ke yenê şawitiş, çîyêk rêze ra nîyo û vat: "Ez sereyê ewilî xeylêk tersaya la ganî ma nêtersê,  hemverê mesajê bi nê rengî bêveng mebê û înan teşhîr bikerê.”

 

Goreyê her herêman polîtîkayêk taybetî yê şerî yeno kerdiş. Bi taybetî zî dimayê serrê 2015 û 2016ine Şirnex de polîtîkayêk xoser ame kerdiş. Hedefê ê polîtîkayan de bi taybetî zî cinî estê. Şîdet, kiştiş, desteştiş û tecawuz zaf zêde bî. Bi taybetî zî demê peyîn de hêrişê cinsperestî serê medyaya dijîtal de zêde bîyê. Rengîn Onuka ke Silopîyê Şirnexî de ciwîyena, bi hêrişêk wina dir rî bi rî mende û derheqê babete de ajansê ma rê qisey kerd.

 

'Şawitişê mesajî çîyêk rêze ra nîyo' 

 

Rengîne, destpêkê bale ant serê mesajan û vat: "Dimayê serrê 2015ine û 2016ine bi hawayêk sîstematîk serê medyaya dijîtalî de mesajî yenê şawitiş. Bi taybetî zî hetê esker, polîs û çawişê pisporî ra nê mesajî yenê şawitiş. Sere de mesajê embazî yenê şawitiş. Demêk verê serê medyaya dijîtalî de hetê polîsêk ra mesajêk mi rê ame şawitiş. Bi vatişê nîjadî û zayendperestî hêrişê mi kerd. Mesajê bi nê rengî ameyî û mi zî fek xebitnayîşê medyaya dijîtalî ra vera da, ez tersa ya. Seba cinîyê derûdorê mi zî mesajê embazî ameyî şawitiş. Ma înan nasnêkenê û nêzanê ê kam ê. No çîyêk asan nîyo û rêze ra nîyo. Eke berjewendîyêk înan çinî bo, çira nê kenê?"

 

'Ma înan serebûtê Îpek Er ra nas kenê'

 

Rengîne wina vat: "Mûsa Orhan ke tecawuzê Îpek Er kerd û bi sebebê merdişê aye. Ma îna Îpek Er ra nas kenê. Wazenê cinîyê ciwanan ê kurdî bixapênê. Ganî cinî bawerîya xo înan rê nêarê. Bi sozê zewacî, wazenê cinîyan bixapênê. Sey serebûtê Îpek Er beno ke serebûtê bi nê rengî reyna bêrê ciwîyayîş. Ez serebûtê Îpek Er ra xeylêk bi tesîr bîya. La hetêk ra zî aye rexna kena. Werrekna bi ey kesî dir qisey nêkerdêne. Ganî cinî rewşa Îpeke baş bifikîryê û wina game bierzê. Semedo ke benê sebebê merg û qetilkerdişê ma. Dewlete leşker, polîs û çawişê pispor pawena. Berê vernî ra gêna, peynî ra vera dana. Semedê nê ganî cinî dîqet bikerê û bizanê ke ê kam ê. Hemverê cinîyan de kayê lêşinî yenê kerdiş û no zî  parçeyêk polîtîkayê şerê taybetî yo."

 

'Wa cinî bêveng nêmanê'  

 

Rengîne wina qedêna: "Ez veng dana cinîyan ke wa hêrişê cinsî niminê û teşhîr bikerê. Mi sere de waşt ke serê medyaya dijîtalî de parekerdiş bikerî û nê kesan teşhîr bikerî. Labelê seba komelî ez tersaya û mi pare nêkerd. Wexto mi  JINNEWSî rê nuşt endîşeyê mi. Dima ra mi vat, ez çira şerm bikerî, kesê ke nê kenê wa şerm bikerê. Ganî tu cinîyêke bêveng nêmano û teşhîr bikero."