Derya Ren 

 

DÊRSIM - Hemsereka HDPyî yê Dêrsimî Nûrşat Yeşîl da zanayene ke sere ra serebûtê Gulîstan Dokû û heme hêrişanê hemverê cinîyan seba vatişanê hukmatî û polîtîkayê ey yenê ca û wina vat: "Hewl yeno dayîş ke serebûtê Gulîstane tarîyî de bimano. Vejîya meydan ke walîyê ê wextî hewl dayo keyeyî bieciqno." 

 

Wendekara Unîversîteya Mûnzûrî Gulîstan Dokû 5ê Çeleyê 2020î de Dêrsim de bişik vindîbî û a roje ra tepîya keyeyî ci ra malûmat nêgirewt. Têkoşînê keyeyî no di serrî yo domneno. Xebatê cigêrayîşê ameyê kerdiş zî qels mendî û derheqê vergumano sereyîn ê serebûtî embazê Gulîstane,  Zaynal Abarakov û babîyê ey Engîn Yucel de cigêrayîş bi resîr nêame kerdiş. 

 

Seranserê Tirkîya û şaristananê herême de rêxistinê cinîyan seba Gulîstane programan û çalakîyan ca ardî. Dêrsim de zî çalakîyê yenê kerdiş rey-rey bi hêrişanê polîsan ra ameyê eciqnayîş. Cinîyan reyna zî dest persê 'Gulîstan Doku ça  de ya' ra veranêda. Hemsereka HDPyî yê Dêrsimî Nûrşat Yeşîl derheqê babete de nîyadîyayîşê xo ard ziwan. 

 

‘Ma bi kiştişê cinîyan aya benê’

 

Nûrşate da zanayene ke Tirkîya de kiştişê cinîyan her tim bîyê la 2002yî de bi ameyîşê AKPyî dir cenî zafêr hedef ameyê girewtiş û wina fikrê xo ard ziwan: "hetê otorîterê dewlete ra cinî hedef ameyê girewtiş û no zî bî sebebê zafêr kiştişê cinîyan. Hukm zî qatilan bêceza verdeno. Ma her roje bi kiştişê cinîyan aya benê. 'Pêkerdişê Stenbolî' ke seba cinîyan xeylêk muhîm bi ame betalkerdiş. No qeraro winasî çi heyf ke cesaret dano qatilan. La hemverê nê zî têkoşînê cinîyan berz beno." 

 

‘Ganî xoverdayîş hîna zafêr bêro kerdiş’

 

Nûrşate, eşkera kerd ke wexto dimayî de muhakeme qerarê fînakan ke dana û na zî bi têkoşînê cinîyan ameya destgirewtiş û wina vat: "Ma seba ke her tewirê nêyewbînîye hemverê cinîyan de meydan ra wurzêwe ma do têkoşînê xo dewam bikerê. Bêşik wexto no bêro kerdiş zî ganî ma tê dir têkoşîn bikerê. Bêşik têkoşînê cinîyan berz bîyo la no qîm nêkeno. Ganî her wextî ra zafêrî biyewbînan bigîrê û vengê xo berz bikerê." 

 

‘Cipersayîşî qels ameyî kerdiş’

 

Nûrşate, diqet ant serê aqûbetê Gulîstan Dokû û vat, Gulîstane seba şarê Dêrsimî bîya birînêka girane û wina vat: “Wexto Gulîstane vindî bî ma embazê HDPyî û Platformê Cinîyan ê Dêrsimî şîyî Baroyê Dêrsimî. Ma fikrê xo ard ziwan. Ma vat babê Zaynalî şubeyê asayîşî de polîs o, qeydê mobeseyê şaristanî destê selahîyetdaran de yo. La çi heyf ke tenê nê serebûtê Gulîstan Dokû, xeylêk serebûtanê bînan de sey Îpek Er û ê bînî de zî bi hêzê dewlete yenê pawitiş. Çi heyf ke cipersayîşêk rast û mird nêame rayîrşîyayîş. Wexto merdim serebûtê Gulîstan Dokû ewneno vîneno ke persêr, cipersayîşêk qels û pey goşî eştiş caardo."

 

‘Wa Gulîstanê bînî vînî nêbê’

 

Nurşate qiseykerdişê xo wina qedêna: “Serê îhtîmalê ke Gulîstane întîxar kerda vindertê. Derheqê îdiayê serê Zaînal de tu cipersayîş nêame kerdiş. Vîndîbîyayîşê Gulîstane de Zaînal gumanbaro sereyîn bi. Waştişê keyeyê Gulîstane ame redkerdiş. La waya ci Aygul Doku seba ke nêverda gumabar keye  bar bikero, cipersayîş ci rê ame kerdiş. Serebûtê Gulîstane tarîtî de yeno verdayîş. Di serrî yo Gulîsane nîna vînayîş. Ma vanê ke Gulîstanê bînî vînî nêbê.”