AMED - Roniştişê polîso ke Sûrê Amedî de Hêlîn Hesret Şene qetil kerd, yewê Sibata 2022yîne de Amedî de do Yewin Dadgeha Cezaya Giran ya Amedî de bêro vînayîşî. 

 

Qezaya Sûrî ya Amedî de wextê qedexeyê tebervejîyayîşê kuçeyan de 12ê Teşrîna Verîne ya 2015î de tuta bi nameyê Hêlîn Hesret Şen ke seba nan bigîro, vejîyabî teber bi guleyanê ‘wesayîta tîpê zirxî yê kobra' ra vejîya ameye qetilkerdene û derheqê polîso bi nameyê Abdullah E. de zî suco ‘bi teqsîrî bîyo sebebê merdişî' dewa ameye akerdene. Dewa de qerarê vindarnayîşê hukumkerdene amebi dayene la Komeleya Heqê Merdiman (ÎHD) ya Amedî îtîrazê qerarî kerdbi û îtîraz amebi redkerdiş. 

 

Dewa cayê ke menda ra do dewam bikero 

 

Serokê Şubeyê ÎHDyê Amedî Abdullah Zeytun da zanayene ke û vat: "Dewaya Hêlîn Hesret Şen ke komeleya înan taqîb kena, Walîyê Amedî derheqê polîso vergumanî de destûrê cipersayîşî dayo û muhakemekerdişê polîsê vergumanî do Yewin Dadgeha Cezaya Giran ya Amedî de cayo ke mendo do dewam bikero." 

 

Dadgehe dîyar kerd ke qerarê hûmare ya 2021/21 a tarîxê 9ê Sibate ya 2021î de Walîtîyê Amedî ra derheqê vergumanî de destûrê cipersayîşî ameyo dayene û derheqê qerarî de dosya ameya cigêrayîşkerdiş. 

 

Seba dewa tarîx ameyo kifşkerdiş

 

Roniştişê dewaya derheqê polîsê vergumanî de do 1ê Sibata 2022yî de bêro vînayîş. Ame kifşkerdiş ke ganî roja roniştene de şahidî hadre bê, kifş bêro kerdene yan zî raporê keso ke zaneno bêro girewtene û peynîye de heme delîlê ameyê arê dayîşî do bêro erjnayîşî.