STENBOL - Dayîka Aştîye Emîne Erbek ke eynî roje di rey erzîya serê keyeyê ci û dima ra ameye destbendkerdiş, dîyar kerd ke hewl yeno dayîş ke aye bitersênê la çi zî bêro kerdiş, aye fek têkoşînê xo ra vera nêdana.

 

Îqtîdar demê peyîn de bi destê hukmî û polîsan Dayîkê Aştîye yê têkoşînê azadîya kurdî de ca gênê, hedef girewto. Dayîkê ke her rey waştişê aştîye anê ziwan, her bernameyê ke tewr benê de yenê derbkerdiş, destbendkerdiş yan zî erzîyeno serê keyeyê înan. Nînan ra yew zî Emîne Erbek a.

 

Semedê belgeyî bêrê îmzakerdiş di rey eştî serê keyeyê aye

 

Semedo ke do bi bahaneyê ganî ewraqî bêrê îmzakerdiş, eynî roje de di rey erzîya serê keyeyê ci. Semedo ke keye de nêbî, dima ra şî Mudurîyê Emnîyetê Kanarya yê Kuçukçekmeceyî û waşt îfade bido. La Emîne na rey ameye destbendkerdiş û ewil raporê weşîye ameye girewtiş û dima ra berdî  Kampusê Zîndanê Sîlîvriyî û vetî dadgehe. Emîne dima ra ameye veradayîş. Çalakî û bernameyê ke Emîne tewr bibî zî sey suc ame vînayîş.

 

Emîne xeylêk rey na rewşe dir ameya rî bi rî, çîyê ke ciwîyaye ajansê ma rê qal kerd.

 

'Demê tepiştişê to ameyo' 

 

Emîne eynî roje de di rey erzîyayo serê keyeyê ci û vat: "Saete yew û nîm bî, ez şîya sersaxiyêke. Telefon da piro. Polîsî bî. Vatî, ‘Vizêr şanî ra ma xo nêresenê to, ti ça de ya? Lez bê keye.' Mi vat, ez dûrî ya, la ez nêzdîyê qerekole ya. Ez û di merdimê xo şî qerekole. Nasname û telefonê mi girewtî. Mi polîsan ra vat, ‘şima mi çira destbend kerdo' vatî, 'demê tepiştişê to ameyo."

 

'Tedayê pîsokolîj kerdî'  

 

Emîne dîyar kerd ke semedo ke wendiş û nuştişê ci çin o, waşto xo biresno avûkat û lajê xo û wina vat: "Mi vat, telefonê mi bidê, ez avûkatê xo gêrena, heta avûkat nêro ez nêkewena qerekole, ez kesî nas nêkena. Lajê mi ame. Dosya mi rê wendî. Vatî, ‘ti emşo mêmana ma ya.' Mi vat, ne rojêke ez sanîyêke tîya nêmanena. Sucê mi çinbi. Mi vat, ‘no heqaret o.' Nê çîyê ke ameyî ciwîyayîş, mi sey tedayê psîkolojîk vîna."

 

'Fotografê mi antî' 

 

Emîne dîyar kerd ke pêwa nêwaşta şêro nêweşxane bi zor aye berdê û dimayê testê Covîd-19 aye reyna berdê qerekolq û wina vat: "Semedê nêweşîyê mi, ez qerekole de tay tersaya. Lajê mi ra vatî, 'şore ma dayîka to vera nêdanê.'  Ma şî dadgeha nobedar. Dozger bi, dadger bi nêzana kam bi vat, dosyaya to veng a. O wext dorê mi girewtî û fotograf antî. Mi vat şima çira ancenê. Mi reaksîyon ramojna. Hemverê nê caardişan mi zehmetî ant. Çend polîsan dorê cinîyêke padayî. Tewr zehmet no bi."

 

'Ez HDPyij a mi suc kerd gelo?' 

 

Emîne dewam de wina vat: "Mi înan ra vat, ‘Ez kurd a, bêguman partîya mi HDP ya û pawena. Vatî, ‘ti Selahattîn Demîrtaş pawena.' Mi vat, belê ez pawena. Ma ez HDPyij a mi suc kerd gelo? Aye zî partîyêke meclisî ya. Ez tewrê çalakîya Sîlîvriyî zî bîya. Ez dayîk a. Nêwazena kes bimiro. Wazenê çimê dayîkan bitersnê. Dayîkê ke tutê xo vînî kerdê, fek nê rayîra vera nêdanê. Dewlete bahaneyan awan kena. 4-5 rey mi destbend kenê. La mi vat, ez sozê xo ra anêgêrena."

 

'Şarê Kurdî nêqedêno'

 

Emîne tewr peyîn wina veng da: "Heme kesî vanê ke ma dayîk ê, kurd, tirk, erebî wa heme vengê xo berz bikerê. Wa êdî merg çinîbo. Gaz, bombe û çekê kîmyewî xebitnenê. Êdî bes o, do heta key dewam bikero. Kam ci ware beno  wa bibo ganî her dayîke vengê xo berz bikero. Wa aştî bêro. Ma kurdî nêqedênê."