Sema Çaglak - Şîrîn Çinar

 

AMED - Cinî, hem hetê camêrdan ra û hem zî hetê dewlete ra bi şîdetî dir rî bi rî mendî. Semedê polîtîkayê bêcezaverdayîşî cinî omidê xo cu ra visnenê.  Nînan ra yew zî L. Ç. ya. L. 11 serrîya xo de xeyalanê xo vînî kena û cuya aye her tim bi şîdetî dir derbaz bena. L.ye pêwa her çî xo ver dana û vera vîyarteyî têkoşînêk pîl daya.

 

Her cayê dinya de cinî rastê her tewirê şîdetî yenê.  Rastî desteştişî û teda yenê. Her ke şino cinî asayîşê cuya xo ra benê endîşeyîn. Roj çin o ke cinî nînê qetîlkerdiş yan zî bi şîdet, tacîz û tecawuzî dir nînê rî bi rî. Pêwa nînan   cinî hem hetê camêrdan ra bi şîdetî dir rî bi rî manenê û hem zî hetê dewlete ra. Semedê polîtîkayê bêcezaverdayîşî cinî omidê xo dewlete ra birnayê. Nê cinîyan ra yew zî L.Ç ya. L.Ç bi pêroyî cuya xo de bi her tewir şîdetî dir rî bi rî menda û nika hewil dana ke bi tena sereyê xo serê lingan de bimano.

 

L. Ç. 34 serrî ya û bi eslê xo Mêrdîn ra ya. L.ye wendegehî de bi hêrişê cinsî û  tacizî dir rî bi rî menda. Mîyanê keye de zî hetê merdimanê xo bi hêrişê cinsî û  tacizî dir rî bi rî menda. Nê dir L.ye çareserî zewacî de vînena û 18 serrîya xo de zewicêna. Labelê dimayê çend aşman L.ye hetê mêrdeyê ke ci dir zewicnaye bena rastê îşkenceyê sîstematîk yena. Her çend wazena xo na rewşe ra xelas bikero  û muracatê  cendirme û qereqolî bikero zî, semedo keye qorîcî bi, muracatê ci bêcewab mendêne. L.ye çîyê ke cuyaya ajansê ma rê qal kerd.

 

'11 serrîya xo de ez bi hêrişê cinsî dir rî bi rî menda'

 

L.ye destpêkê qiseykerdişê xo de dîyar kerd ke tutîya ci de hewn û xeyalê aye bîyê la tutîya ci de cuya ci tarî bîya L. wina qal kerd: "Ma 5 wayê û 3 bira yê. Ma tutîya xo de xeylê zehmetî dî. Mîyanê keyeyî de her wext munaqeşe estbi. Dayîka mi cîyayî kerdêne mabêne tutanê xo û teda bi tutan kerdêne. Mi tu wext dayîka xo ra heskerdişêk nêdî. Waya mi kerdêne xo verike, la mi nêkerdêne. Heme karê keyeyî bi mi dayîne kerdiş. Keye mi ra hes nêkerdêne. Ez şîne wendegeh xeyalê mi estbî ke ez keye şêrî û bibî wayîrê karêke û cuyêke baş. La 11 serrîya mi de xeyalê mi tarî bî. Dayîka mi rojêke mi şawit firine ke nan bigîrî. Gama ke verê xo dayîne keye mêrdeyêkê emr pîl rayîrê mi birna û ez bi tecawuzê ey dir rî bi rî menda. Dimayê ke ez ameya serê hemdê xo ez zaf bermaya û mi dayîke xo ra vat. Ma şî qereqole la pêwa hewildayîşî o kes nêame vînayîş. Semedê mi travmayêkê giran bi. No semed ra wendegeh ra dûr kewta û demêk derg mi nêeşkayîne werd zî biwerî. Psîkolojîyêk xirab serê mi de virazya."

 

'Semedo ke ez tute bîya mi ra bawer nêkerdêne'

 

L. dîyar kerd ke tutîya xo de tena nê serebûtî nêciwîyaya, xeylêk rey hetê merdimanê xo ra  bi hêrişê cinsî dir rî bi rî menda. L, wina vat: "13 serrîya xo de zî hetê xalê xo ra rastê hêrişê cinsî ameya. Gama ke dayîka mi û wayê mi keye ra şîne ameyîne keyeyê ma. Ez xeylêk tersayîne. Mi reyke dayîka xo ra vat, la mi ra bawer nêkerd. Keyeyê mi hamnanî şîne Stenbol. Pîyê mi zî karê şoforî kerdêne û şandînan xebityayîne. Semedo ke ez zî tena nêmanî mi şawitêne keyeyê nacnîye mi. Pîyê nacnîye mi kesêk alkolîk bi. Uca de zî rastê tacîzê nacnîye xo ameya. Mi xo zaf bêçare hîs kerdibi la kesêk destê mi bigîro çin bi."

 

‘Bi serran ez bi îşkence dir rî bi rî menda'

 

L.ye dewam de wina qalê îşkenceyê sîstematîîk kerd: "Ez 18 serrîya xo de zewicyaya Mi vat qey ez bizewicî do cuya mi de rîpelêk newe abibo. La eksê ci dimayê çend aşmî ez bi şîdetî dir rî bi rî menda. Nê zewacî de 5 tutê mi bî. Mêrdeyê mi her wext qûmare kay kerdêne. Coka key ameyîne keye dayîne mi ro û mi tacîz kerdêne. Her tim têkiliyê ci bi cinîyan dir bîne, her reye de cinîyêke ardêne keye. Tewr peyîn cinîyêke ard û ma mecbûr mendî pîya biciwîyê. Tutê mi qij bî û fam nêkerdêne.  Mi keye ra vat, la keyeyî vat, 'çîyêk nêbeno, o camêrdo ti vengê xo meveje.' Ez  êdî mecbûr bîya."

 

‘Mi 8 rey hewl da ke peynîya cuya xo bîyarî'

 

L.ye dewam de wina vat: "Semedê şîdetê êdî ez bêzar bibîya û mi 8 rey hewl da ke peynîya cuya xo bîyara. Mi xo zaf bêçare hîs kerdêne. Mi nêzanayîne se bikerî. Keyeyê mi her çî ra xeberdar bi la çîyêk nêkerdêne. Tutê mi bîne şahîdê îşkenceyî. Reyke lajê min o pîl hemverê pîyê xo vejîya. La hêrişê lajê min û tutanê mi bînan kerd.  Mi û tutanê mi wedarnayî nêweşxane. Mi xeylêk rey raporê derbî girewtêne la gerrekerdişê mi veng bi."

 

'21 rey mi îfade da la çîyêk nêkerdî'

 

L. vat semedo ke keye qorîcî bi gerrekerdişê mi veng vejîyayîne û vat: "Bi 2 serrî yo ez nêeşkena tutanê xo bivînî. Ne dewlete ne zî keye hetkarîyê mi keno. Haya dewlete mi ra esta. Ez xeylêk rey semedê şîdetî nêweşxane de menda û qeydê mi estê. Mi 21 rey qereqole de îfade da. La çîyêk nêame kerdiş. Wayîrê mi nêvejîyayî. Her wext vatêne çîyêk destê ma ra nîno."

 

‘Serê dare de kewta ra û binê dare de ronişta'

 

L.ye wina qiseykerdişê xo qedêna: "Semedê na rewşe ra xelas bibî, ez her wext mîyanê cigêrayîşî de bîya. Ez demêk verê keyeyê xo de menda, ez ewnîyaya nêbeno mi keye terk kerd. Ez bê pere vejîyaya û çend rojan park de menda. Şandînan şîne serê dare û bi roj zî kar gêrayîne. Tewr peyîn mi kafeyêk de kar dî. Wayîrê cinî û mêrdeyê yewbînan bî û xeylêk hetkarîya mi kerdî. Ez şandînan kafe de rakewtêne û bi roj zî xebityayîne. Bi nê şiklî mi pere kom kerd û mi xo rê keye girewt. La wexto ke mi keye girewt na rey eşyayê mi çinî bî. Mi dim ara eşyayê kanî girewtî. Heta ewro zî xebityena. Çend ez xo bêkes hîs bikerî zî ez nika bi tena sereyê xo serê lingan de manena. Nika ez eşkena xo bipawî û debara xo bikerî."